सीजी चाँदबागले मालपोतमा बुझायो फाइल, अध्ययन गरेर प्रक्रिया अघि बढाइने

भूमिसुधार तथा मालपोत कार्यालयले २१ दिनभित्र उपस्थित हुन आग्रह गरेको अन्तिम दिन सीजी चाँदबाग रेसिडेन्सी प्रालीले आफूसँग भएका कागजात बुझाएको छ। 

दिपा दाहाल

बुधबार, १६ फागुन, २०८०

सीजी चाँदबागले मालपोतमा बुझायो फाइल, अध्ययन गरेर प्रक्रिया अघि बढाइने
बाँसबारी छाला तथा जुत्ता कारखानाबाट हडपिएको जग्गामा चौधरी ग्रुपले चलाएको चाँदबाग स्कुल। तस्वीर : मनिष पौडेल/उकालो

काठमाडौँ– सरकारी जग्गा हिनामिना, किर्ते र ठगी प्रकरणमा प्रहरीको केन्द्रीय अनुसन्धान ब्युरो (सीआईबी)को अनुसन्धानमा रहेको सीजी चाँदबाग रेसिडेन्सी प्रालिका अध्यक्ष सञ्जय ठाकुर बुधाबार आफूसँग भएका कागजात बोकेर डिल्लीबजारस्थित भूमिसुधार तथा मालपोत कार्यालयमा उपस्थित भए।

मालपोत कार्यालयले गत माघ २४ गते प्रालिका अध्यक्ष सञ्जय ठाकुरका नाममा २१ दिनभित्र आफैँ वा वारेस मुकरर गरी कार्यालय समयभित्र उपस्थित हुन पत्र काटेको थियो। प्रालिका अध्यक्ष ठाकुरले उक्त पत्र त्यसको भोलिपल्ट मात्रै बुझेका थिए। ठाकुरले मालपोत कार्यालयले तोकेको समय सकिने दिन मात्रै मालपोत कार्यालयमा पुगेर जग्गासँग सम्बन्धित कागजातको फाइल बुझाएका छन्। 

मालपोत प्रमुख छवि नेपालीले बुधबार साँझ कार्यालय सकिने समयमा ठाकुरले फाइल बोकेर आएको र कार्यालयले उक्त फाइल दर्ता गरेर राखेको जानकारी दिए। “फाइल आज दर्ता भए पनि अध्ययन गर्न पाएका छैनौँ। उहाँहरूले के कसो दाबी गर्नुभएको छ। त्यो अध्ययन गरेपछि मात्र थाहा होला,” उनले भने।

ठाकुरले बासँबारी छाला तथा जुत्ता कारखानाको नाममा रहेको सरकारी जग्गा चौधरी समूहको अधिकांश लगानी रहेको तत्कालीन च्याम्पियन फुटवेर लिमिटेडलाई बिक्री गर्दा सरकारको अनुमति लिएको पाइयो त? भन्ने प्रश्नमा मालपोत कार्यालयका प्रमुख नेपालीले भने, “फाइल बुझाएपछि गरिएको कुराकानीबाट उहाँहरू (सीजी चाँदबाग रेसिडेन्सी प्रालि)ले यससम्बन्धी पत्र ल्याएको जस्तो लाग्दैन। यद्यपि फाइलमा भएका सबै कागजात अध्ययन गरेपछि मात्रै हामीले भन्ने कुरा रह्यो।”

बाँसबारीको १० रोपनी जग्गा हिनामिना सम्बन्धी विस्तृत खोजमूलक समाचार २०७९ कात्तिक ५ गते उकालोले प्रकाशित गरेको थियो। 

सीआईबीले उक्त जग्गा सरकारी भएको भन्दै सरकारको नाममा श्रेस्ता अध्यावधिक गरी ल्याउन गत माघ २२ गते मालपोत कार्यालयलाई मिसिलसहित पत्राचार गरेको थियो। सीआईबीको पत्रपछि मालपोत कार्यालयले उक्त जग्गा सरकारका नाममा ल्याउन औपचारिक प्रक्रिया अघि बढाएको थियो। 

बाँसबारी छाला तथा जुत्ता कारखानाको १० रोपनी जग्गा हिनामिना, किर्ते र ठगी कसूरमा सीआईबीले चौधरी समूह अन्तर्गतको सीजी होल्डिङ्सका अध्यक्ष तथा प्रबन्ध निर्देशक अरुण चौधरी, कारखानाका तत्कालीन अध्यक्ष अजितनारायण सिंह थापा र होल्डिङ्सका महाप्रबन्धकसमेत रहेका सञ्जय ठाकुरलाई माघ १८ गते पक्राउ गरेको थियो।

उनीहरूलाई हिरासतमा राखेर अनुसन्धान गर्न काठमाडौँ जिल्ला अदालतले पहिलो पटक चार दिन म्याद थपेको थियो। माघ २२ गते पहिलो पटक थपिएको म्याद सकिएपछि दोस्रो पटक म्याद थपका लागि अदालतमा उपस्थित गराइएको थियो। न्यायाधीश यज्ञप्रसाद आचार्यको इजलासले हिरासतमा राखेर अनुसन्धान गर्नका लागि दुई दिनको मात्रै समय दिएका थिए।

इजलासले दुई दिनभित्रमा अनुसन्धान नसकिए हाजिरी जमानीमा छाड्नसमेत आदेश दिएको थियो। अदालतले उक्त आदेश दिएकै दिन माघ २२ गते नै सीआईबीले मालपोत कार्यालयलाई पत्र लेखेर जग्गा सरकारी भएको भन्दै सरकारको नाममा श्रेस्ता अध्यावधिक गरी ल्याउन पत्र पठाएको थियो। इजलासको आदेशपछि माघ २४ गते सीआईबीले पक्राउ गरेका तीनै जनालाई हाजिरी जमानीमा छाडेको थियो। 

२०४४ सालमा कारखानाको नाममा रहेको १० रोपनी सरकारी जग्गा सरकारको स्वीकृतिबिना नै चौधरी समूहको अधिकाशं लगानी रहेको च्याम्पियन फुटवेयर लिमिटेडलाई बिक्री गरिएको थियो। तत्कालीन कार्यकारी अध्यक्ष थापाले कारखाना सञ्चालक समितिको ४०१औँ बैठकबाट फुटवेयरलाई उक्त जग्गा बिक्री गर्ने निर्णय गराएका थिए। १० रोपनी जग्गा फुटवेयरलाई दिए वापत कारखानाले फुटवेयरबाट २५ प्रतिशत शेयर लिएको थियो। साथै २४ प्रतिशत फुटवेयरको शेयर सर्वसाधारणमा जारी गर्ने सम्झौता भएको थियो।

फुटवेयरले वार्षिक १० लाख क्यानभास जुत्ता उत्पादन गर्ने प्रतिबद्धता कारखानासँग गरेको थियो। यो सम्झौता हाल नेपाली कांग्रेसका प्रतिनिधिसभा सांसदसमेत रहेका अरुण चौधरीका दाइ बिनोद चौधरीको सक्रियतामा भएको थियो। फुटवेयरले तीन वर्षमै जुत्ता उत्पादन बन्द गरेको थियो। २०५१ सालमा फुटवेयरमा कारखानाको नाममा रहेको २५ प्रतिशत शेयर अर्थमन्त्रालय र महालेखा नियन्त्रकको कार्यालयको नाममा नामसारी गरिएको थियो। तर २०५२ सालमा उक्त शेयर अरुण चौधरीलाई नै ३६ लाखमा सरकारले बिक्री गरेको थियो। त्यसपछि २०५४ सालमा फुटवेयरलाई लिमिटेडबाट प्राइभेट बनाइएकोमा पछि कम्पनीको नाम परिवर्तन गरेर सीजी चाँदबाग रेसिडेन्सी प्राइभेट लिमिटेड बनाइएको थियो।

यस कम्पनीको सञ्चालक अरुण चौधरी, शिला चौधरी र सञ्जय ठाकुर रहेका छन्। ठाकुर यस कम्पनीका अध्यक्ष हुन्।

––––– यो पनि ––––––

समाचार प्रभाव – 

फलोअप –

प्रतिक्रिया दिनुहोस !