बालकोटमा ओलीले आफूहरूलाई मिलेर सरकार बनाउन गरेको प्रस्तावबारे पार्टीमा छलफल शुरू गरेको जसपाका नेता अशोक राईले बताए।

प्रतिनिधिसभाको दोस्रो ठूलो दल नेकपा एमालेले मिलेर सरकार बनाउन आग्रह गरेपछि राष्ट्रिय प्रजातन्त्र पार्टी आन्तरिक छलफलमा जुटेको छ।

बैठकमा एमाले, नेकपा माओवादी केन्द्र, राष्ट्रिय स्वतन्त्र पार्टी (रास्वपा) र जनता समाजवादी पार्टी (जसपा)का नेताहरू सहभागी छन्।

नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ नेकपा एमालेका अध्यक्ष केपी शर्मा ओलीको निवास बालकोट पुगेका छन्। 

सत्ता गठबन्धन फुटको संघारमा पुगेपछि प्रतिनिधिसभाको दोस्रो ठूलो दल नेकपा एमाले सक्रिय भएको छ।

नेपाली कांग्रेसका वरिष्ठ नेता रामचन्द्र पौडेलले सत्ता गठबन्धन फुटको अवस्थामा पुगेको बताएका छन्। कांग्रेस र माओवादीका शीर्ष नेताले आआफ्नो अडान नछोडेपछि गठबन्धन संकटमा परेको उनले बताए।

सत्ता गठबन्धनको बैठकमा पहिले प्रधानमन्त्री को बन्ने भन्ने विषय टुंगो नलागेपछि नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बालुवाटारबाट बाहिरिएका छन्।

राष्ट्रपति विद्यादेवी भण्डारीले बहुमतको सरकार गठन गर्न आफूले दिएको समयसीमाभित्र कसैको दाबी नपरे अल्पमतको सरकार गठनका लागि प्रक्रिया अघि बढाउने तयारी गरेकी छन्।

बालुवाटारमा जारी गठबन्धनको बैठकमा माओवादी र एकीकृत समाजवादीले प्रधानमन्त्री, राष्ट्रपति र सभामुख तीन पार्टीले बाँडफाट गर्नुपर्ने अर्को प्रस्ताव राख्ने भएका छन्। 

नेकपा माओवादी केन्द्रका पदाधिकारीहरूको बैठकले माओवादीलाई पहिले प्रधानमन्त्री नदिए वर्तमान सत्ता गठबन्धन छाड्ने निर्णय गरेको छ।

प्रधानमन्त्रीको टुंगो लगाउन सत्ता गठबन्धन दलहरूको बैठक बालुवाटारमा शुरू भएको छ।

प्रधानमन्त्री शेरबहादुर देउवाले आफ्नो पार्टी नेपाली कांग्रेसका शीर्ष नेताहरूसँग छलफल गरेलगत्तै अहिले बालुवाटारमा माओवादी अध्यक्ष पुष्पकमल दाहाल 'प्रचण्ड'सँग ‘वान अन वान’ वार्ता गरिरहेका छन्।

सरकार गठनका विषयमा सहमति जुटाउन प्रधानमन्त्री निवास बालुवाटारमा सत्ता गठबन्धनको बैठक बस्दै छ। 

गठबन्धन दलहरूबीच सरकारको नेतृत्व आलोपालो गर्ने सहमति भए पनि कसले पहिले गर्ने भन्ने टुंगो लागेको छैन।

सत्ता गठबन्धनको बैठकमा माओवादी केन्द्रका अध्यक्ष दाहालले आफूलाई पहिला प्रधानमन्त्री बनाउने पूर्वसहमति नतोड्न कांग्रेस सभापति देउवालाई चेतावनीका छन्।

नयाँ सरकार गठनका लागि राष्ट्रपतिले दलहरूलाई आह्वान गरिसकेको अवस्थामा पनि कामचलाउ सरकारका मन्त्रीहरू नियम कानूनविपरीत कर्मचारी सरुवा र नियुक्तिमा केन्द्रित भएका छन्।

नेकपा एमालेका अध्यक्ष केपी शर्मा ओलीले प्रधानमन्त्रीको इच्छा गरिरहेका माओवादी केन्द्रका अध्यक्ष दाहालले निर्णय लिन ढिलाइ गरेको बताएका छन्।

कांग्रेस नेतृत्वको सरकारमा सहभागी हुन र मधेश सरकार गठनमा सघाउन सीके राउत सहमत भएका छन्।

सरकार गठनबारे धारणा बुझ्न कांग्रेस सभापति शेरबहादुर देउवाले शनिबार मध्याह्न साढे १२ बजे पार्टीका सांसदहरूको भेला बोलाएका छन्।

प्रधानमन्त्रीमा देउवा र दाहाल दुवैको दाबीले सत्ता समीकरण मात्र अन्योलपूर्ण बनाएको छैन, गठबन्धनको भविष्यसँगै संघदेखि प्रदेशसम्म देखापर्ने सम्भावित भिन्न परिदृश्यसमेत आकलन गर्न थालिएको छ।