विश्वकप क्रिकेट लिग २ : नेपालले अन्तिम शृंखलामा क्यानडा र ओमानसँग खेल्दै

काठमाडौँ- नेपाली राष्ट्रिय क्रिकेट टोलीले आईसीसी पुरुष क्रिकेट विश्वकप लिग–२ को अन्तिम शृंखला खेल्दैछ। शृंखला आगामी शुक्रबारबाट ओमानमा शुरू हुँदैछ। विश्वकप छनोटमा पुग्ने नेपालको सम्भावना जोगाउन ओमानमा हुने चार खेल निर्णायक हुनेछन्।

नेपालले अन्तिम शृंखलामा क्यानडा र आयोजक ओमानसँग दुई–दुई खेल खेल्नेछ। पहिलो खेल अक्टोबर ११ मा क्यानडासँग हुनेछ। त्यसपछि अक्टोबर १३ मा ओमानसँग खेल्ने नेपालले अक्टोबर १७ मा फेरि क्यानडा र अक्टोबर १९ मा ओमानसँग प्रतिस्पर्धा गर्नेछ। सबै खेल ओमानको अल अमिरातमा हुनेछन्।

लिग–२ को ३२ खेल खेलिसकेको नेपाल ११ जित र १९ हारसहित २४ अंकमा छ। नेपाल तालिकाको सातौँ स्थानमा छ। 

लिग–२ को अन्त्यमा शीर्ष चारमा रहने टोलीले २०२७ को एकदिवसीय विश्वकप छनोट प्रतियोगितामा स्थान बनाउनेछन्। त्यसैले नेपालका लागि अन्तिम चार खेलमा अधिकतम अंक जोड्नु मात्र पर्याप्त नहुन सक्छ, अन्य टोलीका नतिजाले पनि नेपालको समीकरणमा प्रभाव पार्नेछ।

अन्तिम शृंखलाका लागि नेपालले सन्दीप लामिछानेको कप्तानीमा १५ सदस्यीय टोली घोषणा गरेको छ। टोलीमा आसिफ शेख, दीपेन्द्रसिंह ऐरी, देव खनाल, इशान पाण्डे, रोहित पौडेल, अर्जुन कुमाल, सन्दीप जोरा, बसिर अहमदलगायत खेलाडी छन्। करण केसी, गुल्शन झा, नन्दन यादव, ललित राजवंशी, शेर मल्ल र शहाब आलम पनि टोलीमा छन्।