काठमाडौँ– प्रतिनिधिसभाका संसदीय समितिको पहिलो बैठक मंगलबार बस्दै छ। १० मध्ये सात वटा समितिको बैठक बिहान नौ बजे शुरू भएको संसद् सचिवालयले जनाएको छ।
अर्थ समिति, अन्तर्राष्ट्रिय सम्बन्ध र पर्यटन, उद्योग तथा वाणिज्य र श्रम तथा उपभोक्ता हित, कानुन न्याय तथा मानवअधिकार, राज्य व्यवस्था तथा सुशासन, शिक्षा, स्वास्थ्य तथा सूचना प्रविधि र सार्वजनिक लेखा समितिको बैठक शुरू भएको छ।
सचिवालयका अनुसार दिगो विकास तथा सुशासन समिति र राष्ट्रिय सरोकार तथा समन्वय समितिका बैठक ११ बजे बस्ने छ। यस्तै विधायन व्यवस्थापन समितिको बैठक भने दिउँसो १ बजेलाई बोलाइएको सचिवालयले जनाएको छ। समितिको पहिलो बैठकको अध्यक्षता ज्येष्ठ सदस्यले गरेका छन्।
सबैजसो संसदीय समितिको कार्यसूचीमा स्वागत र परिचय, समितिको कार्यक्षेत्रका सम्बन्धमा जानकारी र विविध राखिएको सचिवालयले जनाएको छ।
संसदीय समितिहरूले सरकारलाई प्रतिनिधिसभाप्रति उत्तरदायी र जबाफदेही बनाउने, सरकारबाट भए गरेका कामकारबाहीबारे अनुगमन र मूल्यांकन गरी आवश्यक निर्देशन वा राय सल्लाह दिन पाउने कानुनी व्यवस्था छ।