काठमाडौँ– कप्तान दीपेन्द्रसिंह ऐरीको उत्कृष्ट अलराउन्ड प्रदर्शनमा विभागीय नेपाल पुलिस क्लब प्रधानमन्त्री कप एक दिवसीय क्रिकेटको सेमिफाइनल प्रवेश गरेको छ।
त्रिवि क्रिकेट मैदानमा बिहीबार सम्पन्न खेलमा लुम्बिनीलाई ६ विकेटले हराउँदै पुलिसले अपराजित यात्रा कायम राखेको हो। लुम्बिनीले दिएको १ सय ८९ रनको लक्ष्य पुलिसले ३७ ओभर १ बलमा ४ विकेट गुमाएर पुरा गर्यो।
पुलिसको जितमा दीपेन्द्रले अविजित रहँदै सर्वाधिक ४३ रन बनाए। उनले ६६ बलमा ५ चौका प्रहार गरे। सुनिल धमलाले २६ बलमा ४ चौका र २ छक्कासहित ३६ रन जोडे। आरिफ शेखले ३५, कुशल भुर्तेलले ३२ र अमित श्रेष्ठले २८ रन बनाए।
लुम्बिनीका अनिल खरेलले २ विकेट लिए। दुर्गेश गुप्ता र मुहमद हुसेनका नाममा १/१ विकेट रह्यो। त्यसअघि किर्तिपुरस्थित त्रिवि क्रिकेट मैदानमा टस जितेर पहिले ब्याटिङ गरेको लुम्बिनीले ४४ ओभर २ बलमा अलआउट हुँदै १ सय ८८ रन बनाएको थियो।
लुम्बिनीका कप्तान देव खनालले ७४ रनको अर्धशतकीय इनिङ्स खेलेपनि हार टार्न सकेनन्। उनले ८८ बलमा ७ चौका र २ छक्का प्रहार गरे। विशाल बिक्रम केसीले ३० रन जोड्दा प्रज्वल थापाले २३ रन बनाए। दुर्गेश थापा र मोहमद हुसेन समान ११/११ रनमा समेटिए।
पुलिसका दीपेन्द्रले ४ विकेट लिए। सागर ढकाल र करण केसीले २/२ विकेट लिए। पुलिस ३ खेलबाट ६ अंक जोड्दै पुलिस अंक तालिकाको शीर्षस्थानमा छ। लुम्बिनी २ खेलमा २ अंक जोडेर दोस्रो स्थानमा छ ।
मधेशको विजयी शुरूआत
बिहीबारनै मुलपानी क्रिकेट मैदानमा भएको खेलमा मधेशले प्रदेश १ लाई ७२ रनले हराएको छ। मधेशले दिएको २ सय १५ रनको लक्ष्यसहित जवाफी ब्याटिङ गरेको प्रदेश १ ले ४३ ओभर १ बलमा १ सय ४२ रन मात्र बनाउन सक्यो।
प्रदेश १ का लागि लुभ कामतले सर्वाधिक २९ रन बनाए । उनले ९४ बलमा २ चौका प्रहार गरेका थिए। विवेक आनन्द मेहेताले ४७ बलमा २ चौका र १ छक्कासहित २५ र फिर्दोश अन्सारीले २२ रन जोडे । मधेशका आदील आलम, रुपेश सिंह, प्रदिप पासवान र विशाल सुलिङले २/२ विकेट लिए।
त्यसअघि टस हारेर पहिले ब्याटिङ गरेको मधेशले ४८ ओभर १ बलमा अलआउट हुँदै २ सय १४ रन बनाएको थियो। मधेशका लागि अनिल साहले ६१ रनको अर्धशतकीय इनिङ्स खेले। विवेक यादवले ५४ बलमा २ चौका र १ छक्कासहित ३२ रन जोड्दा रुपेश सिंहले ३० रन बनाए।
रोहन बिकले २८ रन जोडे । कप्तान हरिशंकर साहले १५ रन बनाए। प्रदेश १ का फिर्दोश अन्सारीले ५ विकेट लिए । सिद्धान्त लोहनीले ३ विकेट लिँदा श्रवन यादव र सोनु मण्डलले १/१ विकेट लिए।
जितसँगै मधेशले १ खेलमा २ अंक जोडेको छ। प्रदेश १ को ३ खेलबाट २ अंक छ।