काठमाडौँ– मनसुनी वायुको प्रभावका कारण देशभर सामान्यदेखि पूर्ण बदली रहेको छ।
मनसुनको न्यूनचापीय रेखा पश्चिमतिर सरदर स्थान आसपास र पूर्वतिर सरदर स्थानभन्दा दक्षिणतिर अवस्थित रहेको मौसम पूर्वानुमान महाशाखाले जनाएको छ।
हाल कोशी, बागमती, गण्डकी, लुम्बिनी र कर्णालीका थोरै स्थानमा हल्का वर्षा भइरहेको छ। दिउँसो पहाडी भूभागमा हावाहुरीसहित हल्कादेखि मध्यम वर्षा हुने महाशाखाको भनाइ छ।
यस्तै, राति कर्णाली र सुदूरपश्चिममा सामान्यदेखि पूर्ण बदली रही बाँकी स्थानमा आंशिकदेखी सामान्य बदली रहनेछ। महाशाखाका अनुसार कर्णाली, सुदूरपश्चिम, गण्डकी र लुम्बिनीका थोरै स्थानमा हल्का वर्षा हुनेछ।
हावाहुरी, वर्षा, चट्याङ, गेग्रान बहाव, बाढीपहिरो तथा भूक्षयका कारण हुनसक्ने क्षतिबाट बच्न आवश्यक सतर्कता अपनाउन पनि महाशाखाले अनुरोध गरेको छ।