काठमाडौँ– काठमाडौँ महानगरपालिकाले आगामी आर्थिक वर्षका लागि २५ अर्ब ५४ करोड ७८ लाख २० हजार रुपैयाँ बराबरको बजेट सार्वजनिक गरेको छ।
उपप्रमुख सुनिता डंगोलले नगरसभाको १३औँ बैठकमा आगामी आर्थिक वर्ष २०८०/८१ को बजेट प्रस्तुत गरेकी हुन्। कुल बजेटमध्ये चालुतर्फ ८ अर्ब ६१ करोड ५३ लाख २८ हजार र पुँजीगततर्फ १६ अर्ब ९३ करोड २४ लाख ९२ हजार विनियोजन गरिएको छ।
बजेटको खर्च जुटाउने स्रोतमध्ये संघ र प्रदेश सरकारबाट प्राप्त हुने सशर्त अनुदानतर्फ १ अर्ब ४५ करोड ६२ लाख, निःशर्त अनुदानतर्फ ७९ करोड ३६ लाख, आन्तरिक आयतर्फ ६ अर्ब ३९ करोड २० र बैंक मौज्दातबाट ११ अर्ब ७५ करोड स्रोत परिचालन गर्ने लक्ष्य छ।
यस्तै, राजस्व बाँडफाँटतर्फ २ अर्ब १६ करोड ५९ लाख र सामाजिक सुरक्षाभत्ता तथा जग्गा एकीकरण आयोजनाको २ अर्ब ९९ करोड आम्दानी हुने महानगरपालिकाले जनाएको छ।
महानगर गौरवका योजनाअन्तर्गत १० वटा विषयगत क्षेत्रका योजनाहरू छनोट गरिएको उपप्रमुख डंगोलले बताइन्। यसका लागि ३ अर्ब ८० करोड रकम छुट्याइएको छ।
यस्तै, महानगर स्वर्णिम योजनाअन्तर्गत २५ वटा विषयगत क्षेत्रका योजनामा २ अर्ब खर्च गरिने बजेट वक्तव्यमा उल्लेख छ। प्राथमिकता प्राप्त योजनाअन्तर्गत वडाहरूबाट तोकिएको सीमाको अधीनमा रही खर्च गर्न गरी १ अर्ब ७६ करोड विनियोजन गरिएको छ।
सार्वजनिक पूर्वाधार निर्माण तथा सुधारतर्फ गत आर्थिक वर्षको क्रमागत योजनासहित ७ अर्ब ३४ करोड ६४ लाख रुपैयाँ छुट्याइएको छ। जसअन्तर्गत सम्पूर्ण सडक तथा पेटीमध्ये डीपीआर भएका सडक तथा पेटीहरू मर्मत तथा निर्माण गरी ‘धुलोरहित काठमाडौँ’ योजना ल्याइएको छ। उक्त योजनाका लागि १ अर्ब खर्चिने गरी बजेट विनियोजन गरिएको छ।
महानगर क्षेत्रको संस्कृति, सम्पदा एवं पर्यटन कार्यक्रमका लागि क्रमागत योजनासहित २ अर्ब १३ करोड ७६ लाख बजेट छुट्याइएको छ। महानगर क्षेत्रभित्रका सम्पूर्ण विद्यालयका पूर्वाधार विकास तथा शैक्षिक गुणस्तर सुधारका निम्ति ‘गरी खाने शिक्षा, महानगरको इच्छा’ योजनाअन्तर्गत ५० करोड राखिएको छ।
६ करोड रुपैयाँ खर्च गर्ने गरी महानगरवासीलाई सहुलियत मूल्यमा औषधि उपलब्ध गराउन ‘सुलभ फार्मेसी’ सञ्चालन गर्ने महानगरले जनाएको छ। महानगरले स्वास्थ्य कार्यक्रमतर्फ ९२ करोड ६६ लाख बजेट छुट्याएको छ।