भारत सरकारले भटमास तेल र सूर्यमुखी तेल आयातमा लाग्ने भन्सार शुल्कमा पाँच प्रतिशत कटौती गरेको छ।
तेलको आयातमा लाग्ने भन्सार शुल्क १७.५ प्रतिशतबाट घटाएर १२.५ प्रतिशतमा झारेको संघीय अर्थ मन्त्रालयअन्तर्गतको राजस्व विभागले जारी गरेको सूचनामा उल्लेख छ।
भारतमा खाना पकाउने दुवै तेल मुख्यतया अर्जेन्टिना, ब्राजिल, युक्रेन र रुसलगायत देशबाट आयात हुने गरेको छ।
घरेलु माग पूरा गर्न र खाना पकाउने तेलको बढ्दो मूल्यलाई नियन्त्रण गर्न यी दुई उत्पादनको थप आयातलाई अनुमति दिने उद्देश्यले यो कदम चालिएको हो। करिब छ महिनापछि भन्सार महसुल पुनरावलोकन गरिएको थियो। “सार्वजनिक हितमा त्यसो गर्न जरुरी छ। यो सूचना जून १५ देखि लागु हुनेछ,” सूचनामा भनिएको छ।
इन्डियन एक्सप्रेसको एक समाचारमा विश्वको सबैभन्दा ठूलो वनस्पति तेल खरिदकर्ता भारतले प्रशोधित भटमास तेल र सूर्यमुखी तेलमा आधार आयात शुल्क घटाएको जनाइएको हो।