काठमाडौँ– इन्डियन प्रिमियर लिग (आईपीएल)मा मुम्बई इन्डियन्सले पहिलो जित दर्ता गरेको छ।
मुम्बईले मंगलबार राति घरेलु टोली दिल्ली क्यापिटल्सलाई ६ विकेटले पराजित गरेको हो। दिल्लीको भने यो लगातार चौथो हार हो। दिल्लीले दिएको १७३ रनको विजयी लक्ष्य मुम्बईले २० ओभरमा ४ विकेट गुमाएर पूरा गर्यो।
मुम्बईका कप्तान तथा ओपनर रोहित शर्माले ४५ बलमा ६ चौका र ४ छक्काको सहयोगमा ६५ रनको अर्धशतकीय ईनिङस् खेले। तिलक बर्माले २९ बलमा १ चौका र ४ छक्काको सहयोगमा ४१ रन बनाए। इसान किसनले २६ बलमा ३१ रन बनाए।
दिल्लीका मुकेश कुमारले २ तथा मुस्ताफिजुर रहमानले १ विकेट लिए।
त्यसअघि अरुण जेट्ली रंगशालमा टस हारेर ब्याटिङमा आएको दिल्लीले १९.४ ओभरमा सबै विकेट गुमाएर १७२ रन बनाएको थियो।
दिल्लीका कप्तान डेविड वार्नरले ४७ बलमा ६ चौका सहयोगमा ५१ रन बनाए। अक्षर पटेलले २५ बलमा ४ चौका र ५ छक्काको सहयोगमा ५४ रनको अर्धशतकीय ईनिङस् खेले।
मुम्बईका पीयुष चावला र जेशन बेरेनडर्फले समान ३/३ विकेट लिए। यस्तै रिलि मिरिडेथले २ तथा ऋतिक शोकिनले १ विकेट लिए।
जितसँगै ३ खेलबाट दुई अंक जोडेको मुम्बई आठौँ स्थानमा छ। अंकविहीन दिल्ली तालिकाको पुछारमा छ।