काठमाडौँ– नवप्रवेशी एफसी खुमलटारले शहीद स्मारक 'ए' डिभिजन लिग फुटबलमा दोस्रो जित निकालेको छ।
च्यासल मैदानमा सोमबार सम्पन्न खेलमा खुमलटारले हिमालयन शेर्पा क्लबलाई २-१ गोल अन्तरले पराजित गरेको हो।
खुमलटारको जितमा मनिष थापा र स्टेफन समिरले १/१ गोल गरे। हिमालयनका विश्वास श्रेष्ठले गरेको गोल सान्त्वना रह्यो।
पहिलो हाफमा १ गोल भएको खेलको दोस्रो हाफमा थप २ गोल भएको थियो।
२२औँ मिनेटमा मनिषले गोल गर्दै खुमलटारलाई शुरूआती अग्रता दिलाएका थिए। ६५औँ मिनेटमा समिरले गोल गर्दा खुमलटारको अग्रता दोब्बर बनाए। ८०औँ मिनेटमा हिमालयनका विश्वासले गोल गरे।
जितसँगै खुमलटारले ४ खेलमा ६ अंक जोडेको छ। खुमलटार अंक तालिकामा चौँथो स्थानमा उक्लिएको छ। पराजित हिमालयनको ४ खेलमा ४ अंक छ।