काठमाडौँ– नेपालमा मनसुनी वायुको प्रभावका साथै झारखण्ड आसपास रहेको वायुको आंशिक प्रभाव रहेको छ।
मनसुनको न्यून चापीय रेखा पश्चिमतिर सरदर स्थानभन्दा उत्तर र पूर्वतिर सरदर स्थान आसपास रहेको मौसम पूर्वानुमान महाशाखाले जनाएको छ।
जसका कारण देशभर आंशिकदेखि सामान्य बदली रही कोशी, बागमती र गण्डकीमा हल्का वर्षा भइरहेको छ। दिउँसो देशभर आंशिकदेखि सामान्य बदली रहनेछ।
कोशी, कर्णाली, लुम्बिनी, मधेश र सुदूरपश्चिमका केही स्थानमा हल्कादेखि मध्यम वर्षाको सम्भावना छ। बागमती र गण्डकीका एक–दुई स्थानमा भने मेघगर्जन र चट्याङसहित भारी वर्षा हुने महाशाखाले जनाएको छ।
यस्तै, कोशीको तराई भूभाग तथा मधेश प्रदेशमा हावाहुरीसमेत चल्ने सम्भावना छ।
गण्डकी प्रदेशका एकदुई स्थानमा राति पनि भारी वर्षा हुने महाशाखाले जनाएको छ।