काठमाडौँ– नेपालले एसीसी यू–१६ इस्ट जोन कपको फाइनलमा नेपालले घरेलु टोली मलेसियासामु २५३ रनको लक्ष्य प्रस्तुत गरेको छ।
बायोमास ओभल मैदानमा टस जितेर पहिला ब्याटिङ रोजेको नेपालले निर्धारित ३५ ओभरमा ८ विकेट गुमाउँदै २५२ रन बनाएको हो।
नेपालका नरेन भट्ट ११२ रनमा नटआउट रहे। उनले ८९ बलमा १० चौका र २ छक्का प्रहार गरे। ओपनर निरज यादव ४९ बलमा ६ चौकासहित ४७ रनमा आउट भए।
सन्तोष यादवले २६ तथा सूर्यांशु कोइरालाले १८ रनको योगदान दिए।
मलेसियाका मोहम्मद अक्रमले ३ विकेट लिए। एरिन अकिल, हजिक हाइक्वेल र मुहम्मद फदुलका नाममा १/१ विकेट रह्यो।