काठमाडौँ– कानून, न्याय तथा संसदीय मामिलामन्त्री धनराज गुरुङले सरकारले अवैध सम्पत्तिलाई नियन्त्रण गर्ने कुरामा हेलचक्र्याइँ नगरेको दाबी गरेका छन्।
आइतबार प्रतिनिधिसभाको दोसो बैठकमा ‘मुलुकी संहितासम्बन्धी केही नेपाल ऐनलाई संशोधन गर्ने विधेयक, २०८०’ माथिको सैद्धान्तिक छलफलमा भाग लिने क्रममा सांसदले उठाएका प्रश्नको जवाफ दिने क्रममा उनले सो कुरा बताएका हुन्।
“कालो धन, अवैध सम्पत्तिलाई नियन्त्रण गर्नुपर्ने कुरामा दुई मत रहेन। यसको हेलचक्र्याइँ भइरहेको सन्दर्भ उठेको छ। पटक्कै हेलचक्र्याइँ गर्न खोजिएको छैन,” उनले भने।
मन्त्री गुरुङले कालो धन, अवैध सम्पत्तिलाई नियन्त्रण गर्ने विषयमा सरकारले ठूलोसानो, दायाँबायाँ केही पनि नहेर्नेसमेत स्पष्ट पारे। उनले सरकार पीडितलाई न्याय दिने र पीडकलाई कारबाही गर्ने कुरामा पछि नपर्ने पनि पटक पटक दोहोर्याए। उनले वित्तीय अनुशासन उल्लंघन गर्नेहरूलाई सरकारले नछोड्ने पनि दोहोर्याए।
त्यसअघि सत्तारूढ प्रमुख घटक नेपाली कांग्रेसका सांसद प्रदीप पौडेलले वित्तीय अनुशासन उल्लंघन गर्नेहरूमाथि कारबाही गर्ने खालको कानून बनाउने कामलाई सरकार र संसद्ले ख्याल नगरेको भन्दै आपत्ति जनाएका थिए।