काठमाडौँ– भक्तपुरमा जारी खुल्ला पुरुष राष्ट्रिय भलिबल प्रतियोगिताको सेमिफाइनल समीकरण पुरा भएको छ।
सूर्यविनायक नगरपालिका–४ हर्सचोकमा भइरहेको प्रतियोगितामा न्युटन एकेडेमी, सिर्जनशील समाज, लिखु टिम र गणतान्त्रिक खेलकुद महासंघ अन्तिम चारमा पुगेका हुन्।
आइतबार सम्पन्न क्वाटरफाइनलमा आयोजक सिर्जनशील समाजले गान्धी आदर्श टिमलाई २५–१९ र २५–१६ को सोझो सेटमा पराजित गर्दै सेमिफाइनल पुगेको छ। यस्तै यस्तै न्युटन एकेडेमीले कागेश्वरी मनोहरालाई २५–१६ र २५–१८, गणतान्त्रिक खेलकुद महासंघले भक्तपुर जिल्ला खेलकुद विकास समितिलाई २५–१० र २५–२१ तथा लिखु–८ ले लिखु सेवा समाजलाई २५–२३ र २६–२४ ले पराजित गरेका हुन्।
आयोजक समितिका संयोजक पेशल आचार्यका अनुसार शनिबार शुरू भएको प्रतियोगितामा ८ जिल्लाका १० टिमको सहभागिता छ।
सोमबार हुने फाइनलको विजेताले ५० हजार, उपविजेताले २५ हजार र तृतीयले १५ हजार रुपैयाँ पुरस्कार प्राप्त गर्ने आचार्यले बताए।