पार्टी
एमालेको चियापनमा शीर्ष नेताको जमघट
काठमाडौँ– प्रमुख प्रतिपक्ष दल नेकपा एमालेले दशैँ, तिहारलगायतका चाडपर्वको अवसर पारेर आयोजना गरेको शुभकामना आदानप्रदान तथा चियापान कार्यक्रममा राजनीतिक दलका शीर्ष नेताहरू सहभागी भएका छन्।
पार्टी अध्यक्ष एवं पूर्वप्रधानमन्त्री केपी शर्मा ओलीको निमन्त्रणामा बुधबार पार्टी केन्द्रीय कार्यालय च्यासलमा आयोजना गरिएको कार्यक्रममा प्रधानमन्त्री एवं माओवादी केन्द्रका अध्यक्ष पुष्पकमल दाहाल ‘प्रचण्ड’ अपराह्न पौने ३ बजेतिर चियापान समारोहमा सहभागी भए थिए।
चियापान कार्यक्रममा प्रतिनिधिसभाका सभामुख देवराज घिमिरे, राष्ट्रियसभा अध्यक्ष गणेशप्रसाद तिमिल्सिना, नेपाली कांग्रेसका सभापति एवं पूर्वप्रधानमन्त्री शेरबहादुर देउवा, नेकपा एकीकृत सामवादीका सम्मानित नेता एवं पूर्वप्रधानमन्त्री झलनाथ खनाल, नेपाल समाजवादी पार्टीका अध्यक्ष एवं पूर्वप्रधानमन्त्री डा. बाबुराम भट्टराई, मन्त्रिपरिषद्का पूर्वअध्यक्ष खिलराज रेग्मीको पनि सहभागिता थियो।
त्यस्तै, राष्ट्रिय स्वतन्त्र पार्टीका सभापति रवि लामिछाने, नेपाल कम्युनिस्ट पार्टी (नेकपा) का महासचिव नेत्रविक्रम चन्द विप्लव, नेकपा मालेका महासचिव सिपी मैनाली, पूर्वसभामुख दमननाथ ढुंगाना, विभिन्न राजनीतिक दलका नेताहरू, नेपालस्थित कूटनीतिक नियोगका प्रमुख तथा प्रतिनिधिहरू, नेपाल सरकारका उच्चपदस्थ कर्मचारीहरूसहितको बाक्लो उपस्थिति रहेको थियो।
एमालेले दशैँलगत्तै हरेक वर्ष चियापान कार्यक्रम गर्दै आएको छ। बुधबार आयोजना गर्ने भनिएको कार्यक्रम संयुक्त राष्ट्रसंघका महासचिव एन्टोनियो गुटेरेसको नेपाल भ्रमणका कारण एक दिनपछि सारिएको हो। चियापान कार्यक्रममा एमालेका नेता–कार्यकर्ताको बाक्लो उपस्थिति थियो।
यसअघि कोजाग्रत पूर्णिका दिन नेपाल कांग्रेसले आयोजना गरेको चियापन तथा शुभकामना आदानप्रदान कार्यक्रममा पनि शीर्ष नेताहरूको जमघट भएको थियो।
प्रकाशित मिति:
11/1/2023 6:28:42 PM