काठमाडौँ– दोलखाको गौरीशंकर गाउँपालिका–८ मा पहिरोले घर बगाउँदा चार जना बेपत्ता भएका छन्।
तीन जना घाइते भएको वडाध्यक्ष दावारेन्जी शेर्पाले जानकारी दिए। शेर्पाका अनुसार गएराति भीषण वर्षासँगै आएको पहिरोले सल्ले र गोपाटार गाउँमा सात घर बगाएको छ।
घर बगाउँदा एकै घरका तीन जनासहित चार जना बेपत्ता भएका हुन्। पहिरोका कारण १६ परिवार विस्थापित भएको वडाध्यक्ष शेर्पाले बताए। बेपत्ता र घाइतेको परिचय खुल्न नसकेको उनको भनाइ छ।
“हामी पहिरो स्थलतर्फ गइरहेका छौँ। पहिरोले बाटो, पुल र सडक पनि बगाएको छ। दुर्गम भएकाले थप विवरण आउन बाँकी छ,” उनले भने।
बेपत्ताको खोजी र घाइतेको उद्धारका लागि काठमाडौँबाट हेलिकप्टर मगाइएको गाउँपालिका अध्यक्ष विश्वास कार्कीले बताए।