काठमाडौँ– सार्वजनिक यातायात सुधारका लागि अध्ययन गर्न विज्ञसहितको कार्यदल गठन भएको छ।
भौतिक पूर्वाधार तथा यातायातमन्त्री नारायणकाजी श्रेष्ठले सात सदस्यीय कार्यदल गठन गरेका हुन्। पूर्वसचिव शरदचन्द्र पौडेल संयोजक रहेको कार्यदलले सवारी प्रदूषण, सवारी सुरक्षा तथा दुर्घटना न्यूनीकरणसम्बन्धी अध्ययन गरेर प्रतिवेदन पेस गर्ने छ।
कार्यदलमा पूर्वप्रहरी अतिरिक्त महानिरीक्षक (एआईजी) विज्ञानराज शर्मा, पुल्चोक इन्जिनियरिङ क्याम्पसका प्राध्यापक डा. पदमबहादुर शाही, यातायातविज्ञ मधुसुदन आचार्य, इन्जिनियर विजय गौतम र यातायात व्यवसायी महासंघका प्रतिनिधि सदस्य छन्।
यातायात व्यवस्था विभागका महानिर्देशक डा. टोकराज पाण्डेय कार्यदलको सदस्यसचिव छन्।