काठमाडौँ– इन्डियन प्रिमियर लिग (आईपीएल) को जारी सिजनमा रोयल च्यालेन्जर्स बैंगलुरुले दोस्रो जित दर्ता गरेको छ।
बिहीबार घरेलु टोली सनराइजर्स हैदराबादलाई ३५ रनले हराएको हो। यसअघि बैंगलुरुले पन्जाब किङ्सलाई ४ विकेटले हराएको थियो। सिजनका अरू ७ खेलमा पराजय बेहोरेको टोली तालिकाको पुछारमा छ।
राजीव गान्धी अन्तर्राष्ट्रिय रंगशालामा २०७ रनको लक्ष्य पछ्याएको हैदराबदले निर्धारित २० ओभरमा ८ विकेटको क्षतिमा १७१ रन मात्र बनाउन सक्यो। टोलीका लागि सहवाज अमेदले सर्वाधिक ४० रनको योगदान दिए। अभिषेक शर्मा र प्याट कुमिन्सले समान ३१–३१ रन बनाए।
बैंगलुरुका स्वप्निल सिंह, कर्ण शर्मा र क्यामेरुन ग्रिनले समान २–२ तथा विल ज्याक्स र याश दयालले समान १–१ विकेट लिए।
त्यसअघि टस जितेर ब्याटिङ रोजेको बैंगलुरुले निर्धारित २० ओभरमा ७ विकेट गुमाउँदै २०६ रन बनाएको थियो।
बैंगलुरुका विराट कोहलीले ५१ तथा रजत पाटिदार ५० रनको अर्धशतकीय इनिङ्स खेले। क्यामरोन ग्रिनले ३७ तथा फाफ डु प्लिसिसले २५ रन जोडे । हैदराबादका जयदेवले ३, टि नटराजनले २ तथा प्याट कुमिन्स र मयंक मार्कण्डेले समान १–१ विकेट लिए।