पूर्व–पश्चिम राजमार्ग चार लेन र काठमाडौँमा फ्लाईओभर तथा अन्डरपास बन्ने

काठमाडौँ- आर्थिक वर्ष २०८०/८१ को बजेट प्रस्तुत गर्दै अर्थमन्त्री डा. प्रकाशशरण महतले पूर्व पश्चिम राजमार्गलाई चार लेनमा विस्तार गर्ने बताएका छन्। “पूर्व पश्चिम राजमार्गको विस्तार तथा स्तरोन्नतिका लागि ३१ अर्ब २ करोड विनियोजन गरेको छु,” अर्थमन्त्री डा. महतले भने। 

पूर्व पश्चिम राजमार्गलाई विस्तार तथा स्तरोन्नति कार्यलाई तीब्रता दिइने बताउदै अर्थमन्त्री महतले नारायणगढ–बुटवल र कमला–कञ्चनपुर खण्डको विस्तार तथा स्तरोन्नतिको कार्य आगामी आर्थिक वर्षमा सम्पन्न गरिने घोषणा गरे। 

कमला–ढल्केवर–पथलैया, वुटवल–गोरूसिङ्गे, काकडभिट्टा–लौकही, पथलैया–नारायणगढ र लमही–भालुवाङ सडकखण्डको स्तरोन्नति शुरू गरिने बजेटमा उल्लेख छ । नारायणी नदी र तिनाउ नदीमा सिग्नेचर पुल निर्माण गर्ने योजना पनि बजेटमा समेटिएको अर्थमन्त्री महतले बताए। 

सुलभ, सुरक्षित, गुणस्तरीय र दिगो यातायात पूर्वाधारमा सरकारले लगानी केन्द्रित गर्ने महतले बताए । नागरिक जीवनलाई सहज बनाउन तथा आर्थिक विकासको आधार तयार गर्न प्रतिफलयुक्त पूर्वाधारमा सरकारको प्राथमिकता रहेको उनले जनाए। 

काठमाडौैमा फ्लाईओभर तथा अन्डरपास 
काठमाडौैको रिङरोडमा फ्लाईओभर र अन्डरपास बनाउने योजना बजेटभित्र परेको छ। कोटेश्वर, सातदोबाटो र एकान्तकुनामा फ्लाईओभर र अन्डरपास निर्माण गरिने अर्थमन्त्री प्रकाशशरण महतले बजेट भाषणमा बताए। 

कोटेश्वर, सातदोबाटो र एकान्तकुनामा फ्लाईओभर र अन्डरपास निर्माण कार्य शुरूआत गरिनुका साथै राष्ट्रिय राजमार्गमा आवश्यकतानुसार फ्लाइओभर र अन्डरपास निर्माण गरिने बजेटमा उल्लेख छ । 

ललितपुरको ग्वार्कोमा फ्लाईओभर निर्माण कार्य आगामी आर्थिक वर्षमा सम्पन्न गरिने जनाइएको छ । त्यस्तै काठमाडौँ चक्रपथको कलंकी–बसुन्धरा खण्डको सडक विस्तार तथा निर्माण कार्यलाई २ अर्ब ७ करोड छुट्टयाइएको छ। 

आगामी आर्थिक वर्षमा पुल निर्माणका लागि २ अर्ब ८ करोड विनियोजन गरेको बताउदै अर्थमन्त्री महतले १ सय ५० वटा पुल निर्माण कार्य राजमार्ग र रणनीतिक सडक अन्तर्गत सम्पन्न गरिने बताए।