काभ्रेपलान्चोकमा बस दुर्घटना हुँदा आठ जनाको मृत्यु

काठमाडौँ– काभ्रेपलान्चोकको नमोबुद्ध नगरपालिका–२ बुचाकोटमा यात्रुवाहक बस दुर्घटना हुँदा आठ जनाको घटनास्थलमै मृत्यु भएको छ।

बनेपादेखि रोशी गाउँपालिकातर्फ जाँदै गरेको बा २ ख ८३९८ नम्बरको बस शुक्रबार दिउँसो करिब २:१५ बजे सडकबाट दुई सय मिटर तल खसेको थियो। 

दुर्घटनामा चालकसहित १६ जना घाइते भएको जिल्ला प्रहरी कार्यालय काभ्रेपलान्चोकका प्रहरी नायब उपरीक्षक रविन विष्टले जानकारी दिए।

उनका अनुसार घाइतेहरूको धुलिखेल अस्पतालमा उपचार भइरहेको छ। घटनाको विस्तृत विवरण र दुर्घटनाको कारणबारे थप अनुसन्धान भइरहेको प्रहरीले जनाएको छ।