रोल्पामा भएको जीप दुर्घटनामा दाङका तीन जनाको मृत्यु

दाङ– रोल्पामा बिहीबार भएको जीप दुर्घटनामा परी दाङका तीन जनाको मृत्यु भएको छ। जिल्लाको माडी गाउँपालिका-२ घर्तीगाउँ ब्याङखोलामा भारतीय नम्बर प्लेटको एमएच १४ टिसिजे ४७१ नम्बरको जीप दुर्घटना भएको हो।

जिल्ला प्रहरी कार्यालयका अनुसार मृत्यु हुनेहरूमा घोराही उपमहानगरपालिका-७ बेसाहीका २५ वर्षीय जीप चालक वीरबहादुर चौधरी, दङ्गीशरण गाउँपालिका-७ श्रीगाउँ घर भई हाल घोराही उपमहानगरपालिका-१४ बस्ने अन्दाजी ४० वर्षका जिउधन चौधरी र उनकी श्रीमती अन्दाजी ३८ वर्षीया कमला चौधरी रहेका छन्।

प्रहरीका अनुसार बिहीबार बिहान भएको दुर्घटनामा निर्माण सामग्री बोकेको उक्त जीप सडकबाट करिब ६ सय मिटर तल खसेको थियो । दुर्घटनाबारे थप अनुसन्धान भइरहेको प्रहरीले जनाएको छ।