महानगरमा ६ हजार सहकारी बचतकर्ताको उजुरी, पौने ५ अर्ब फिर्ता गर्न माग

काठमाडौँ– काठमाडौँ महानगरपालिका सहकारी विभागमा ४ अर्ब ७७ करोड ४९ लाख २३ हजार रुपैयाँ बचत रकम फिर्ता गरिदिनका लागि ६ हजारभन्दा बढी बचतकर्ताले माग गरेका छन्। कामपा सहकारी विभागका अनुसार पछिल्लो समय बचत रकम फिर्ता गरिदिनका लागि अत्यधिक माग आउन थालेको हो।

सहकारी विभागका प्रमुख ध्रुवकुमार काफ्लेका अनुसार उल्लेखित बचत रकम फिर्ताका लागि गत वैशाख १७ गतेदेखि हालसम्म आएका उजुरीका आधारमा ६ हजार ३०० बचतकर्ताले माग गरेका छन्। यसरी माग दाबी गर्ने बचतकर्तामा एक लाखदेखि ५ लाखसम्म रुपैयाँको रकम बढी रहेको उनले जानकारी दिए।

प्रमुख काफ्लेले भने, “निवेदनका आधारमा औसतमा यसरी उजुरी दिनेमा दैनिक ५०० देखि १ हजार जम्मा गर्ने अर्थात् साना रकम जम्मा गर्ने बचतकर्ताको संख्या अत्यन्तै बढी छ।” उनका अनुसार उजुरी आएकामध्ये साना बचतकर्ताको संख्या ७८ प्रतिशत छ।

कामपाले गत सोमबार र मंगलबार गरी बुद्ध दर्शन सेभिङ एन्ड क्रेडिट को-अपरेटिभ लिमिटेडका ३४ जना बचतकर्ताको बचत रकम फिर्ता गराएको प्रमुख काफ्लेले जानकारी दिए। कामपा–६ मा सञ्चालित बुद्ध दर्शन सेभिङ एन्ड क्रेडिट सहकारी संस्थाले उक्त दिन १ लाख ५० हजार रुपैयाँसम्म बचत गर्नेको रकम फिर्ता गरेको हो।

सहकारीले आगामी एक महिनाभित्र पाँच लाखसम्म बचत गर्ने बचतकर्ताको रकम फिर्ता दिने योजना बनाएको विभागले जानकारी दिएको छ। कामपाले ठूला बचतकर्ताका हकमा सहकारी विभागसँग समन्वय गरेर ऋणीलाई पनि ताकेता गर्ने र बचतकर्ताको पनि बचत रकम फिर्ता गर्दै प्रक्रिया अघि बढाएको छ।

सहकारी विभागले बचत फिर्ता र ऋण असुली दुवै प्रक्रियामा सहजीकरण गरिरहेको कामपा सहकारी विभागको भनाइ छ। विभागका प्रमुख काफ्लेले बचत रकम फिर्ताका लागि गरिने सहजीकरण प्रक्रियाका विषयमा भने, “माग दाबीसहितको निवेदन लिन्छौँ। संस्थाका सञ्चालक र बचत फिर्ता माग गर्नेका बीच छलफल तथा मिलापत्र गराउने प्रयास गर्छौं।”

वडास्तरको मेलमिलापबाट नटुङ्गिएमा विभागले मिलाउन प्रयास गर्ने प्रमुख काफ्लेले बताए। यस क्रममा संस्थाका सञ्चालक सम्पर्कमा आउन अटेर गरेमा कारबाहीका लागि सिफारिस पनि गरिने उनले जानकारी दिए।