देशका यी स्थानमा वर्षा र हिमपातको सम्भावना

काठमाडाैँ– अहिले काठमाडाैँ उपत्यकासहित आसपासका क्षेत्रमा पानी परिरहेको माैसम पूर्वानुमान महाशाखाले जनाएको छ।

महाशाखाका अनुसार हाल नेपालमा पश्चिमी र स्थानीय वायु, नेपालको पूर्वी भू-भाग नजिक तल्लो वायुमण्डलमा रहेको न्यूनचापीय क्षेत्रको प्रभावका साथै पूर्वदेखि पश्चिमसम्म फैलिएको न्यूनचापीय रेखा नेपालको पूर्वी भूभागको नजिक रहेको छ।

यसले गर्दा आज दिउँसो देशको पहाडी र हिमाली भूभागमा साधारणतया बादल लाग्ने तथा देशको तराई भूभागमा आंशिक बादल लाग्नेछ। देशको हिमाली र पहाडी भूभागका केही स्थानहरूमा तथा मधेश प्रदेश लगायत कोशी प्रदेशको तराईको थोरै स्थानहरूमा र बाँकी तराई भूभागका एक/दुई स्थानमा मेघगर्जन र चट्याङ्गसहित मध्यम सम्मको वर्षा/हिमपातको पनि सम्भावना रहेको छ।

यस्तै राति, देशभर साधारणतया बादल लाग्नेछ। कोशी, मधेश, बागमती, गण्डकी र लुम्बिनी प्रदेशको केही स्थानहरूमा तथा कर्णाली र सुदूरपश्चिम प्रदेशको थोरै स्थानहरुमा मेघगर्जन र चट्याङ्ग तथा  हावाहुरी, असिनासहित मध्यम सम्मको वर्षा/हिमपातको सम्भावना रहेको महाशाखाले जनाएको छ। लुम्बिनी प्रदेशको पहाडी भूभागको एक/दुई स्थानमा मेघगर्जन र चट्याङ्गसहित भारी वर्षाको पनि  सम्भावना रहेको छ।