आज र भोलि भारी वर्षाको सम्भावना, कुन-कुन ठाउँमा हुनेछ वर्षा?

काठमाडौँ- नेपालमा पश्चिमी र स्थानीय वायुको साथै नेपालको पूर्वी भूभाग नजिक तल्लो वायुमण्डलमा रहेको न्यून चापीय क्षेत्रको आंशिक प्रभाव रहेको छ।

जल तथा मौसम विज्ञान विभागका अनुसार हाल देशको हिमाली र पहाडी भूभागमा साधारणतया बादल बादल लागेको छ र बाँकी भूभागमा आंशिक बादल लागेको छ। गण्डकी प्रदेशका एक-दुई ठाउँमा मेघगर्जन/चट्याङसहित हल्का पानी परिरहेको छ।

आज दिउँसो कोशी, बागमती र गण्डकी प्रदेशका केही स्थानहरूमा तथा मधेश प्रदेशलगायत लुम्बिनी, कर्णाली र सुदूरपश्चिम प्रदेशका पहाडी र हिमाली भूभागका थोरै स्थानहरूमा मेघगर्जन/चट्याङसहित मध्यम सम्मको वर्षा र हिमपातको सम्भावना रहेको छ।

आज राति कोशी प्रदेशका धेरै स्थानहरूमा र मधेश, बागमती र गण्डकी प्रदेशका केही स्थानहरूमा तथा लुम्बिनी, कर्णाली र सुदूरपश्चिम प्रदेशका भूभागका थोरै स्थानहरूमा मेघगर्जन/चट्याङसहित मध्यम सम्मको वर्षा र हिमपातको सम्भावना रहेको छ। कोशी प्रदेशका हिमाली र पहाडी भूभाग तथा गण्डकी प्रदेशका पहाडी भूभागको एक-दुई स्थानमा मेघगर्जन/चट्याङसहित भारी वर्षा र हिमपातको सम्भावना रहेको विभागले जनाएको छ।

त्यस्तै, विभागले वैशाख १५ गते र १६ गते कोशी र गण्डकी प्रदेशका हिमाली र पहाडी भूभागका एक-दुई स्थानमा मेघगर्जन/चट्याङसहित भारी वर्षा र हिमपातको सम्भावना रहेकोले आवश्यक सतर्कता अपनाउन अनुरोध समेत गरेको छ।