नेप्से परिसूचक ८३ अंकले बढ्यो, १० अर्ब ९२ करोडको शेयर कारोबार

काठमाडौँ– साताको दोस्रो कारोबार दिन सोमबार नेपाल स्टक एक्सचेन्ज (नेप्से) परिसूचक उच्च अंकले बढेर बन्द भएको छ।

पछिल्ला दिनमा सम्पत्ति शुद्धीकरणसम्बन्धी अनुसन्धानका क्रममा व्यवसायीहरू पक्राउ पर्न थालेपछि त्रसित बनेको शेयर बजारमा अर्थमन्त्री डा. स्वर्णिम वाग्लेको आश्वासनपछि सुधार देखिएको हो।

आइतबार १०० अंकभन्दा बढीले घटेको बजारलाई स्थिर बनाउन सोमबार बिहान स्टक ब्रोकर एसोसिएसनका प्रतिनिधिहरूले अर्थमन्त्री वाग्लेलाई भेटेका थिए। भेटका क्रममा उनले सरकार निजी क्षेत्र तथा पुँजीबजारप्रति सकारात्मक रहेको स्पष्ट पार्दै इन्साइडर ट्रेडिङ र म्यानिपुलेसनजस्ता अनैतिक गतिविधिमा संलग्न नभए डराउनुपर्ने अवस्था नरहेको बताएका थिए। यही सन्देशले लगानीकर्तामा विश्वास बढाएको विश्लेषकहरूको भनाइ छ।

सोमबार नेप्से परिसूचक ८३.३३ अंकले बढेर २७६०.०२ विन्दुमा पुगेको छ। सेन्सेटिभ इन्डेक्स १४.३० अंकले उकालो लागेको छ भने फ्लोट इन्डेक्स ६.०१ र सेन्सेटिभ फ्लोट इन्डेक्स ५.०३ अंकले वृद्धि भएको छ।

यद्यपि बजार बढे पनि कारोबार रकम अघिल्लो दिनको तुलनामा घटेको छ। आइतबार १२ अर्ब ३८ करोड रुपैयाँ बराबरको कारोबार भएकोमा सोमबार १० अर्ब ९२ करोड ८५ लाख रुपैयाँमा सीमित रह्यो। यस दिन ३४५ कम्पनीका २ करोड ५१ लाखभन्दा बढी कित्ता सेयर एक लाख २४ हजारभन्दा बढी पटक किनबेच भएका छन्।

कारोबारका क्रममा ८ कम्पनीका सेयर मूल्यमा सकारात्मक सर्किट लागेको छ। कारोबार रकमका आधारमा रिलायन्स स्पिनिङ मिल्स शीर्ष स्थानमा रहँदा हिमालयन रि-इन्स्योरेन्स र एनआरएन इन्फ्रास्ट्रक्चर क्रमशः दोस्रो र तेस्रो स्थानमा रहे।

यस दिन सबै १३ उपसमूहका परिसूचक उकालो लागेका छन्। जलविद्युत् उपसमूह सबैभन्दा धेरै ४.५९ प्रतिशतले बढ्दा वित्त, बैंकिङ, विकास बैंक, होटल तथा पर्यटन र लगानी समूहमा पनि उल्लेख्य सुधार देखिएको छ।