घुस रकमसहित सशस्त्रका प्रहरी निरीक्षक पक्राउ

धनुषा– अख्तियार दुरुपयोग अनुसन्धान आयोगले धनुषाको मिथिला नगरपालिका–१० लालगढबाट सशस्त्र प्रहरी बलका एक प्रहरी निरीक्षकलाई ४० हजार रुपैयाँ घुससहित पक्राउ गरेको छ। पक्राउ पर्नेमा सशस्त्र प्रहरी निरीक्षक वकिल अधिकारी रहेका छन्।

अख्तियारको बर्दिवास कार्यालयका अनुसार कमला–ढल्केवर–बाग्मती सडक निर्माण आयोजनाअन्तर्गत माटो तथा ग्राभेल फिलिङ कार्य गरिरहेका एक ठेकेदारसँग घुस लिँदै गर्दा अधिकारीलाई शुक्रबार पक्राउ गरिएको हो। उनले विभिन्न बहानामा निर्माणमा प्रयोग हुने सवारीसाधन रोक्ने तथा काममा अनावश्यक बाधा पुर्‍याएको आरोप छ।

ठेकेदारसँग रकम मागेको सूचनाका आधारमा अख्तियारको टोलीले उनलाई घुस रकमसहित रङ्गेहात नियन्त्रणमा लिएको हो। पक्राउ परेका अधिकारीमाथि थप अनुसन्धान भइरहेको अख्तियारले जनाएको छ।