सर्लाहीमा स्कर्पियोको ठक्करबाट एक जनाको मृत्यु, ११ घाइते

काठमाडौँ- सर्लाहीको बरहथवा नगरपालिका–१० सितापुरमा शुक्रबार साँझ स्कर्पियोको ठक्करबाट एक जनाको मृत्यु भएको छ। दुर्घटनामा ११ जना घाइते भएका छन्।

जिल्ला प्रहरी कार्यालय सर्लाहीका अनुसार शुक्रबार साँझ करिब ७ बजे बरहथवाबाट सितापुरतर्फ जाँदै गरेको डीएल ९ सीजेड ०७७७ नम्बरको स्कर्पियोले विवाहमा जन्ती आएका मानिसलाई ठक्कर दिएको हो।

दुर्घटनापछि प्रहरीले स्कर्पियो र चालक सर्लाही बरहथवा नगरपालिका – १२ लौकठ निवासी नरेश ठाकुरलाई पक्राउ गरी इलाका प्रहरी कार्यालय बरहथवामा राखेको छ।

दुर्घटनामा गम्भीर घाइते भएका बरहथवा नगरपालिका– ९ निवासी करिब ५० वर्षीय नारायण जर्गा मगरलाई उपचारका लागि नगर अस्पताल बरहथवा लगिएको थियो। राति करिब ८ बजे चिकित्सकले उनको मृत्यु भएको जानकारी दिए।

घाइतेहरूको विभिन्न अस्पतालमा उपचार भइरहेको प्रहरीले जनाएको छ। दुर्घटनाबारे थप अनुसन्धान भइरहेको जिल्ला प्रहरी कार्यालय सर्लाहीले जनाएको छ।