प्रतिनिधिसभा निर्वाचन: रास्वपा ४६ क्षेत्रमा विजयी, ७ सिट जित्दै दोस्रो स्थानमा कांग्रेस

काठमाडौँ– फागुन २१ गते सम्पन्न प्रतिनिधिसभा सदस्य निर्वाचनको मतगणना जारी छ। निर्वाचन आयोगको शनिबार ३:४५ बजेसम्मको तथ्यांकअनुसार १६५ निर्वाचन क्षेत्रमध्ये हालसम्म ५७ क्षेत्रको प्रत्यक्षतर्फको नतिजा सार्वजनिक भएको छ।

सार्वजनिक नतिजाअनुसार राष्ट्रिय स्वतन्त्र पार्टी (रास्वपा)का उम्मेदवार ४६ क्षेत्रमा विजयी भएका छन्। रास्वपाका उम्मेदवारहरू थप ७३ क्षेत्रमा अग्रस्थानमा छन्। 

त्यसैगरी, नेपाली कांग्रेसले ७ सिट जित्दै १२ क्षेत्रमा अग्रता कायम राखेको छ। नेकपा (एमाले)ले २ सिटमा विजय प्राप्त गरी ७ क्षेत्रमा अग्रता लिएको छ भने नेपाल कम्युनिष्ट पार्टीले १ सिट जित्नुका साथै ७ क्षेत्रमा अग्रता कायम राखेको छ।

श्रम संस्कृति पार्टीले तीन क्षेत्रमा अग्रता लिँदा स्वतन्त्र उम्मेदवारहरूले १ सिटमा जित र १ क्षेत्रमा अग्रता बनाएका छन्। राष्ट्रिय प्रजातन्त्र पार्टी भने १ सिटमा अगाडि छ।

प्रत्यक्षतर्फको मतगणनासँगै समानुपातिक निर्वाचन प्रणालीतर्फको गणना पनि अघि बढिरहेको छ। आयोगको एकीकृत प्रणालीमा प्रविष्ट विवरणअनुसार हालसम्म तीन लाख २० हजार ११ मत गणना भएको छ।

समानुपातिकतर्फ पनि रास्वपा नै अग्रस्थानमा छ। रास्वपाले एक लाख ७२ हजार ७७७ मत प्राप्त गरेको छ। त्यसपछि नेपाली कांग्रेसले ५२ हजार ६३२, नेकपा (एमाले)ले ४० हजार १९, नेपाली कम्युनिस्ट पार्टीले १६ हजार ५२९ र राष्ट्रिय प्रजातन्त्र पार्टीले १४ हजार ३९७ मत ल्याएका छन्।

यस्तै, श्रम संस्कृति पार्टीले ७ हजार ७४८, राष्ट्रिय परिवर्तन पार्टीले ५ हजार ५०४, नेपाल मजदुर किसान पार्टीले १ हजार ५८० र नेपाल कम्युनिस्ट पार्टी (माओवादी) ले १ हजार २० मत प्राप्त गरेको आयोगले जनाएको छ।