इरानविरुद्धको कारबाहीमा ३ अमेरिकी सैनिकको मृत्यु, ५ गम्भीर घाइते

अमेरिकी केन्द्रीय कमान्ड (सेन्टकम)ले इरानविरुद्धको सैन्य कारबाहीका क्रममा तीन अमेरिकी सैनिक मारिएको पुष्टि गरेको छ। अमेरिकाले शनिबार इरानमाथि आक्रमण शुरू गरेयता अमेरिकी पक्षमा ज्यान गुमाउने सुरक्षाकर्मीको यो पहिलो घटना हो।

अमेरिकी सेनाका अनुसार अन्य पाँच सैनिक गम्भीर घाइते भएका छन्। मारिएका सैनिकहरूको नाम उनीहरूको परिवारलाई जानकारी गराइएको २४ घण्टा पछि मात्र सार्वजनिक गरिने सेन्टकमले जनाएको बीबीसीले उल्लेख गरेको छ।

इरानविरुद्धको सैन्य अभियान घोषणा गर्ने क्रममा राष्ट्रपति डोनाल्ड ट्रम्पले 'अमेरिकी नायकहरू' को ज्यान जान सक्ने र क्षति बेहोर्नुपर्ने चेतावनी पहिले नै दिएका थिए। “यो प्रायः युद्धमा हुने गर्दछ,” उनले भनेका थिए।

शनिबार बिहान इरानविरुद्ध 'अपरेसन एपिक फ्युरी' शुरू भएको घोषणा गर्दै ट्रम्पले आगामी दिन र हप्ताहरूमा अमेरिकी सैनिकहरू मारिन सक्ने सम्भावनालाई स्पष्ट रूपमा प्रस्तुत गरेका थिए। अहिले सेन्टकमले तीन सैनिकको मृत्यु र पाँच जना गम्भीर घाइते भएको आधिकारिक पुष्टि गरेको हो।

सैन्य विशेषज्ञहरूका अनुसार युद्धको प्रकृति र विश्वभर ठूलो मात्रामा सेना तथा सामग्रीको ओसारपसार गर्दा हुने जोखिमका कारण यस परिमाणमा हताहत हुनुलाई स्वाभाविक मानिन्छ। उनीहरूका अनुसार युद्ध बाहेकका अन्य सैन्य गतिविधिका क्रममा पनि क्षति हुने सम्भावना सधैँ रहन्छ।

तर, राष्ट्रपति ट्रम्पका लागि प्रत्येक अमेरिकी सैनिकको मृत्युले आन्तरिक राजनीतिमा दबाब बढाउन सक्छ। ट्रम्पले यस सैन्य अभियानलाई आतंकवादविरुद्धको लामो विश्वव्यापी युद्धसँग जोड्दै यसलाई छिटो, सफल र कम क्षति हुने कार्यका रूपमा स्थापित गर्न चाहेका छन्। आगामी दिनहरूमा राष्ट्रपति ट्रम्प र अन्य प्रशासनिक अधिकारीहरूले यस विषयलाई राजनीतिक रूपमा बारम्बार उठाउने सम्भावना देखिएको छ।