इरानबाट ‘जतिसक्दो छिट्टै’ बाहिरिन आफ्ना नागरिकलाई चीनको आग्रह

चीनले शुक्रबार आफ्ना नागरिकलाई ‘जतिसक्दो छिट्टै’ इरानबाट बाहिर निस्कन आग्रह गरेको छ।

चीनको विदेश मन्त्रालयले सामाजिक सञ्जालमा जारी गरेको विज्ञप्तिमा भनिएको छ, “अहिले इरानमा रहेका चिनियाँ नागरिकलाई सुरक्षा सावधानी अपनाउन र जतिसक्दो चाँडो सुरक्षित स्थानमा जान सल्लाह दिइएको छ।”

सोही दिन संयुक्त राज्य अमेरिकाले पनि इजरायलस्थित दूतावासका गैर–आपत्कालीन कर्मचारीलाई इरान छोड्न सुझाव दिएको थियो। अमेरिकाले मध्यपूर्वमा दशकौँपछिको सबैभन्दा शक्तिशाली सैन्य निर्माणलाई रोक्न दबाब दिएको छ र त्यसो नभए इरानमाथि आक्रमण गर्ने चेतावनी दिएको छ।

इरान र अमेरिकाबीच ओमानको मध्यस्थतामा भएको वार्ताको एक दिनपछि अमेरिका र चीनले आफ्ना मुलुकका नागरिकलाई अति आवश्यकबाहेक त्यहाँ नबस्न अनुरोध गरेका हुन्।

यो वार्ता युद्ध रोक्नका लागि अन्तिम प्रयासका रूपमा हेरिएको छ। वार्तामा तेहरानले वासिङ्टनलाई सम्झौतामा पुग्न ‘अत्यधिक कडा माग’ छाड्नुपर्ने चेतावनी दिएको थियो।

बेइजिङको विदेश मन्त्रालयले शुक्रबार आफ्ना नागरिकलाई ‘हालको सुरक्षा अवस्थालाई ध्यानमा राख्दै तत्कालका लागि इरानको यात्रा नगर्न’ भनेको छ।

इरान र छिमेकी मुलुकमा रहेका चिनियाँ दूतावास तथा वाणिज्य दूतावासले व्यावसायिक उडान वा स्थलमार्गबाट स्थानान्तरण हुन चाहने चिनियाँ नागरिकलाई ‘आवश्यक सहयोग’ प्रदान गर्ने विदेश मन्त्रालयले बताएको छ।