टिपर सफा गर्ने क्रममा प्रसारण लाइनमा छोइँदा चालकको मृत्यु

सिरहा– गोलबजार नगरपालिका–२ स्थित गुरुधाम जाने बाटोमा टिपरको हाइड्रोलिक उठाउने क्रममा करेन्ट लागेर चालकको मृत्यु भएको छ।

मृत्यु हुनेमा गोलबजार नगरपालिका–३ घर भई वडा नं २ मा बस्दै आएका ४३ वर्षीय सन्तोष साह रहेको प्रहरीले जनाएको छ। 

आज बिहान प्रदेश २–०–००१ क ००४५ नम्बरको टिपरको पछाडिको भाग सफा गर्ने क्रममा हाइड्रोलिक उठाउँदा विद्युत् प्रसारणलाइनमा छोइएपछि करेन्ट लाग्दा टिपरमा आगलागी भएको थियो। 

गम्भीर घाइते भएका सवारीधनी समेत रहेका साहलाई तत्काल उद्धार गरी उपचारका लागि स्थानीय हेल्थ केयर अस्पताल लगिएकामा चिकित्सकले मृत घोषणा गरेका जिल्ला प्रहरी कार्यालयका सूचना अधिकारी तथा प्रहरी नायब उपरीक्षक रमेशबहादुर पालले जानकारी दिए।