तनहुँका मतदाताको प्रश्न: कहिले बन्छ दुलेगौँडा–हर्कपुर सडक?

दमौली– दुलेगौँडा–हर्कपूर मोटरमार्ग हरेक निर्वाचनमा नेताहरूको चुनावी नारा बन्छ। स्थानीय तहदेखि प्रदेश र प्रतिनिधिसभासम्म जो उम्मेदवार आए पनि एउटै वाचा गर्छन्, यो सडक बनाउँछु। यही सडकलाई देखाएर नेताहरूले चुनाव जिते पनि सडकको अवस्था उस्तै रहेको शुक्लागण्डकी नगरपालिका–३ कालिमर्‍याङका दलबहादुर थापाले बताए। “वर्षौं भयो, सडकको अवस्था सुध्रिएको छैन। वर्षायाममा हिलोले गाडी फस्छ, हिउँदमा धुलोले सास फेर्न गाह्रो हुन्छ,” उनी भन्छन्। 

शुक्लागण्डकी नगरपालिका–६ ब्यागनका विष्णुमाया परियारले चुनावका बेला मात्रै सडकले प्राथमिकतामा पाउने गरेकामा गुनासो गरिन्। “सडकको सास्ती कति छ, शब्दमा बयान गर्नै सकिँदैन। नेताहरूले यो बाटोलाई चुनावी भाषणको मसला मात्रै बनाए,” उनी भन्छिन्, “हामीले दुःख भोगिरहेका छौँ, उनीहरू भाषण गरेर सत्तामा पुगिरहेका छन्।”

दुलेगौँडा–हर्कपुर मोटरमार्गको शुक्लागण्डकी नगरपालिका–३ वन्केवाको टारदेखि म्याग्दे गाउँपालिका–६ हर्कपुर खण्ड कालोपत्रेका लागि ठेक्का लगाएको सात वर्ष पुगेको छ। गण्डकी प्रदेश सरकारको ‘एक निर्वाचन क्षेत्र, एक रणनीतिक सडक’ योजनाअन्तर्गत दुलेगौँडा–हर्कपुर मोटरमार्ग कालोपत्रे गर्न २०७६ कात्तिक ४ गते शंकरमाली निर्माण सेवा प्रालि काठमाडौँले ठेक्का लियो। 

१०.१८ किलोमिटर सडक कालोपत्र २०७८ माघ १६ गतेभित्र सक्ने सम्झौता भए पनि हालसम्म चार पटक म्याद थप भएको छ। थपिएको म्याद आगामी चैतमा सकिन्छ। तर, काम भने ५० प्रतिशत पूरा भएको छैन। 

शुक्लागण्डकी नगरपालिका, म्याग्दे गाउँपालिका हुँदै व्यास नगरपालिकासँग जोडिने उक्त खण्डको दूरी २३ किलोमिटर छ। पहिलो चरणमा १० किलोमिटर सडक कालोपत्रका लागि ठेक्का सम्झौता भएको थियो। 

स्थानीय एवं दुलेगौँडा हर्कपुर मोटरमार्ग उपभोक्ता समितिका पूर्वअध्यक्ष देउबहादुर श्रेष्ठले यस क्षेत्रकै सबैभन्दा पुरानो सडक समयमै सम्पन्न नहुँदा स्थानीय र यात्रुले धुलो र हिलोको मार खेपेको बताए।