रुसी जनरलमाथि गोली हान्ने सन्दिग्ध दुबईमा पक्राउ

मस्को— रुसी सैन्य गुप्तचर विभाग (जीआरयू)का वरिष्ठ अधिकारी भ्लादिमिर एलेक्सेयेभलाई मस्कोमा गोली हानेर घाइते बनाएको आरोपमा एक रुसी नागरिक दुबईबाट पक्राउ परेका छन्। रुसी संघीय सुरक्षा सेवा (एफएसबी)का अनुसार ती संदिग्धलाई संयुक्त अरब इमिरेट्स (यूएई)बाट रुस सुपुर्दगी गर्ने प्रक्रिया शुरू गरिएको छ।

रुसी सरकारी सञ्चारमाध्यमका अनुसार ६० वर्षीय ती व्यक्ति शुक्रबार मस्कोस्थित एक अपार्टमेन्टमा एलेक्सेयेभमाथि गोली प्रहार गरी फरार भएका थिए। आक्रमणमा सख्त घाइते भएका एलेक्सेयेभको हाल अस्पतालमा उपचार भइरहेको छ।

एलेक्सेयेभ रुसको जीआरयू सैन्य गुप्तचर सेवाका उपप्रमुख हुन्। सन् २०१८ मा बेलायतमा पूर्व जासुस सेर्गेई स्क्रिपलमाथि भएको 'नर्भ एजेन्ट' आक्रमण र विभिन्न साइबर हमलामा संलग्न रहेको आरोपमा उनीमाथि पश्चिमा मुलुकहरूले प्रतिबन्ध लगाएका छन्।

रुसी विदेशमन्त्री सर्गेई लाभरोभले यस गोलीकाण्डको योजनाकार युक्रेन रहेको आरोप लगाएका छन्। यद्यपि, युक्रेनले यस विषयमा हालसम्म कुनै औपचारिक टिप्पणी गरेको छैन।

सन् २०२२ फेब्रुअरीमा युक्रेनमाथि पूर्णकालीन आक्रमण शुरू गरेयता रुस र मस्को नियन्त्रित क्षेत्रहरूमा कैयौँ उच्च पदस्थ सैन्य अधिकारीहरू निशानामा पर्दै आएका छन्।