पाकिस्तानी सुरक्षा बलको आक्रमणमा ९२ आतंकवादीको मृत्यु

पाकिस्तानको बलोचिस्तान प्रान्तमा सुरक्षा बलको अपरेसनमा ९२ जना आतंकवादीको मृत्यु भएको छ। शनिबार भएको उक्त अपरेसनका क्रममा १८ निर्दोष नागरिक र १५ सैनिकको पनि मृत्यु भएको जनाइएको छ। 

सैनिक प्रवक्ताका अनुसार, आतंकवादीले ग्वादर, खारण र अन्य जिल्लामा विभिन्न आक्रमणको योजना बनाएका थिए। यस्ता आक्रमणले स्थानीय जनजीवन संकटमा पार्ने र क्षेत्रीय विकासमा बाधा पुर्‍याउने खतरा थियो। 

प्रभावित क्षेत्रमा सुरक्षा र सफाइ अपरेसन जारी राख्ने र आतंकवादी गतिविधिमा संलग्न सबैलाई न्यायको कठघरामा ल्याइने सेनाले जनाएको छ। प्रान्तभर आतंक फैलाउने योजना रोक्न र स्थानीय जनजीवन तथा विकासमा सुरक्षा सुनिश्चित गर्ने लक्ष्यसहित सुरक्षा बलले सो क्षेत्रमा निगरानी जारी राखेको छ। 

बलोचिस्तान प्रान्त पाकिस्तानको रणनीतिक दृष्टिले महत्त्वपूर्ण क्षेत्र हो। यहाँ बन्दरगाह शहर ग्वादर, प्राकृतिक स्रोत र आर्थिक परियोजना रहेका छन्। केही वर्षदेखि यो क्षेत्रमा विभिन्न आतंकवादी समूह सक्रिय रहेका छन्। 

पाकिस्तानले नियमित रूपमा सुरक्षा अपरेसन सञ्चालन गर्दै आएको छ। जसले आतंकवादी गतिविधि रोक्न र स्थानीय जनजीवन सुरक्षीत बनाउन सहयोग पुर्‍याएको छ। (रासस/सिन्ह्वा)