देशका केही भागमा वर्षा हुने

काठमाडाैँ– हाल नेपालमा पश्चिमी वायुको आंशिक प्रभाव रहेको माैसम पूर्वानुमान महाशाखाले जनाएको छ।

गए राति कर्णाली र सुदूरपश्चिम प्रदेशको पहाडी र हिमाली भूभागका केही स्थानमा बादल लाग्नुका साथै एकदुई स्थानमा हल्का हिमपात र वर्षा भएको छ।

महाशाखाका अनुसार मंगलबार दिउँसो गण्डकी, कर्णाली र सुदूरपश्चिम प्रदेशका उच्च पहाडी तथा हिमाली भूभागमा साधारणतया बादल लागी  बाँकी भूभागमा आंशिक बादल लाग्नेछ। कर्णाली र सुदूरपश्चिम  प्रदेशको उच्च पहाडी तथा हिमाली भू‍भागका थोरै स्थानहरूमा तथा गण्डकी प्रदेशको उच्च पहाडी तथा हिमाली भेगको एक/दुई स्थानमा हल्का हिमपात र वर्षाको सम्भावना रहेको छ।

साथै, लुम्बिनी, कर्णाली र सुदूरपश्चिम प्रदेशको पहाडी तथा तराई भूभागमा मेघगर्जन र चट्याङ्गसहित वर्षाको समेत सम्भावना रहेको महाशाखाले जनाएको छ। यस्तै, तराईं भेगमा हुस्सु र कुहिरो लागेको छ।