इन्डोनेसिया पहिरो: मृतकको संख्या १६ पुग्यो, ८० जना अझै बेपत्ता

इन्डोनेसियाको वेस्ट जाभा प्रान्तमा शनिबार गएको पहिरोमा परी मृत्यु हुनेको संख्या १६ पुगेको छ। पश्चिम जाभाका प्रहरी प्रवक्ताले दिएको जानकारीअनुसार मृतकमध्ये सात जनाको पहिचान भइसकेको छ भने बाँकी शवहरूको पहिचानका लागि डीएनए परीक्षण भइरहेको छ।

वेस्ट ब्यान्डुङ जिल्लाको चिसारुआ क्षेत्रमा पहिरो गएको हो। पहिचान हुन नसकेका शवहरूलाई अहिले स्थानीय अस्पतालमा राखिएको छ। इन्डोनेसियाको राष्ट्रिय खोज तथा उद्धार एजेन्सीले प्रभावित क्षेत्रमा करिब २५० प्रशिक्षित कर्मचारी तैनाथ गरेको छ। जोखिमपूर्ण भौगोलिक अवस्था र अस्थिर जमिनका कारण उद्धार कार्य चुनौतीपूर्ण बनेको एजेन्सीले जनाएको छ। उद्धारका लागि ड्रोन, खोजी कुकुर र केही ठूला उपकरणहरू समेत प्रयोग गरिएको छ।

उद्धार टोलीले अझै पनि करिब ८० जना मानिस माटोको थुप्रोमुनि पुरिएको हुनसक्ने आशंका गरेको छ। टोलीले घटनास्थलमा सम्भव भएसम्मका सबै प्रभावकारी उपायहरू अपनाएर खोजी कार्य जारी राखेको छ।

स्थानीय प्रशासनले सर्वसाधारणलाई प्रभावित क्षेत्रमा नजान र सतर्कता अपनाउन निर्देशन दिएको छ। सरकारले घटनाको विस्तृत अध्ययन सुरु गर्नुका साथै भविष्यमा यस्ता प्राकृतिक विपत्तिबाट हुने क्षति न्यूनीकरणका लागि आवश्यक सुरक्षा रणनीतिबारे प्रारम्भिक अनुसन्धान शुरू गरेको छ।