इस्लामाबादमा वैवाहिक समारोहमा ग्यास विस्फोट, नवदम्पतीसहित ८ जनाको मृत्यु

पाकिस्तानको राजधानी इस्लामाबादमा आयोजित एक विवाह समारोहपछि आइतबार बिहान ग्यास सिलिन्डर विस्फोट हुँदा बेहुला–बेहुलीसहित कम्तीमा आठ जनाको मृत्यु भएको छ। प्रहरी र सरकारी अधिकारीहरूले घटनाको पुष्टि गर्दै मृतकको संख्या बढ्न सक्ने बताएका छन्।

इस्लामाबाद प्रहरीका अनुसार विवाहको रिसेप्सन (भोज) सकिएपछि पाहुना र नवदम्पती सोही घरमा सुतेका थिए। बिहान अचानक भएको शक्तिशाली विस्फोटका कारण घरको एक भाग पूर्ण रूपमा भत्किँदा उनीहरूको घटनास्थलमै मृत्यु भएको हो। विस्फोटमा अन्य सात जना गम्भीर घाइते भएका छन्। उनीहरूको स्थानीय अस्पतालहरूमा उपचार भइरहेको प्रहरीले जनाएको छ।

प्रहरीले जारी गरेको विज्ञप्तिअनुसार विस्फोट शहरको केन्द्रमा रहेको आवासीय क्षेत्रमा भएको थियो। घटनालगत्तै पुगेको उद्धार टोली र दमकल विभागले भग्नावशेषमा पुरिएकाहरूको खोजी तथा उद्धार गरेका थिए। विस्फोटको तीव्रताका कारण छिमेकी घरहरूमा समेत क्षति पुगेको छ।

सरकारी प्रशासक साहिबजादा युसुफले घटनाको कारण पत्ता लगाउन विस्तृत अनुसन्धान शुरू गरिएको जानकारी दिए। प्रारम्भिक अनुसन्धानले ग्यास सिलिन्डर चुहावट भई विस्फोट भएको देखाएको छ।

प्रधानमन्त्री शाहबाज सरिफले यस दुःखद घटनाप्रति गहिरो शोक व्यक्त गर्दै मृतकका परिवारप्रति समवेदना प्रकट गरेका छन्। उनले घाइतेहरूको निःशुल्क र प्रभावकारी उपचार सुनिश्चित गर्न स्वास्थ्य अधिकारीहरूलाई निर्देशन दिँदै घटनाको निष्पक्ष छानबिन गर्न आदेश दिएका छन्।

पाकिस्तानमा प्राकृतिक ग्यासको न्यून चापका कारण धेरै घरपरिवारले तरलीकृत पेट्रोलियम ग्यास (एलपिजी) सिलिन्डर प्रयोग गर्ने गर्छन्। गुणस्तरहीन सिलिन्डर र सावधानीको कमीले गर्दा समय–समयमा विस्फोटका घातक दुर्घटना हुने गरेका छन्।