भेनेजुएलापछि ग्रिनल्यान्डमाथि ट्रम्पको नजर

भेनेजुएला विरुद्ध अमेरिकी सैन्य कारबाहीपछि अमेरिकी राष्ट्रपति डोनाल्ड ट्रम्पले धेरै दक्षिण अमेरिकी देशहरूलाई खुलेआम धम्की दिएका छन्।

डोनाल्ड ट्रम्पले आइतबार संयुक्त राज्य अमेरिकालाई राष्ट्रिय सुरक्षाको लागि ग्रिनल्यान्ड चाहिने कुरा दोहोर्‍याए। एयर फोर्स वानमा मिडियासँग कुरा गर्दै, उनले आर्कटिक टापुमा अमेरिकी नियन्त्रण आवश्यक रहेको बताए।

डोनाल्ड ट्रम्पको भनाइले भेनेजुएला विरुद्ध अमेरिकी सैन्य कारबाही अन्तिम उपाय होइन भन्ने स्पष्ट संकेत गरेको छ। उनले अमेरिकालाई ग्रिनल्यान्डको अत्यन्त आवश्यकता रहेको साथै त्यो क्षेत्र रुसी र चिनियाँ जहाजले घेरिएको पनि बताए। उनले भने, "राष्ट्रिय सुरक्षाको दृष्टिकोणबाट, हामीलाई ग्रिनल्यान्ड चाहिन्छ। यो अत्यन्तै रणनीतिक महत्त्वको छ, ग्रिनल्यान्ड हाल रुसी र चिनियाँ जहाजहरूले घेरिएको छ।" अमेरिकाले पश्चिमी गोलार्धलाई प्रतिद्वन्द्वी शक्तिहरूबाट जोगाउनुपर्ने तर्क पनि ट्रम्पले गरे।

अद्वितीय ध्रुवीय पारिस्थितिक प्रणाली रहेको र सुमेरु महासागर क्षेत्रमा पर्ने ग्रिनल्यान्ड डेनमार्क राज्यको एक स्वायत्त क्षेत्र हो। डेनमार्ककी प्रधानमन्त्री मेट्टे फ्रेडरिक्सनले ट्रम्पलाई ग्रिनल्यान्ड कब्जा गर्ने धम्की बन्द गर्न आग्रह गरेकी छन्।

"अमेरिकाले ग्रिनल्यान्ड कब्जा गर्नुपर्ने कुरा गर्नुको कुनै अर्थ छैन। अमेरिकालाई डेनिस अधिराज्यका तीन देशहरूमध्ये कुनैलाई पनि गाभ्ने अधिकार छैन," फ्रेडरिकसनले आइतबार एक विज्ञप्तिमा भनिन्।

शनिबार, अमेरिकाले भेनेजुएलामा बमबारीपछि राष्ट्रपति निकोलस मादुरोलाई अपदस्थ गरेपछि डेनिस क्षेत्र ग्रिनल्यान्डमा पनि त्यस्तै हुन सक्नेबारे डेनमार्कमा चिन्ता बढेको अन्तर्राष्ट्रिय सञ्चार माध्यमले जनाएका छन्।

"त्यसैले म अमेरिकालाई ऐतिहासिक रूपमा नजिकको सहयोगी र अर्को देश र मानिसहरू विरुद्धको धम्की रोक्न जोडदार आग्रह गर्दछु, तिनीहरू बिक्रीको लागि छैनन्," फ्रेडरिकसनले भनिन्।

अमेरिकी राष्ट्रपतिले स्वशासित डेनिस क्षेत्र र नेटो सदस्य ग्रिनल्यान्डलाई अमेरिकाको हिस्सा बन्न बारम्बार आह्वान गरेका छन्।

युरोप र ⁠उत्तर अमेरिकाबीचको ग्रिनल्यान्डको रणनीतिक स्थितिले यसलाई अमेरिकी ब्यालिस्टिक क्षेप्यास्त्र प्रतिरक्षा प्रणालीको लागि एक प्रमुख स्थल बनाउँछ। साथै ग्रिनल्यान्डको खनिज स्रोत पनि राम्रो भएकाले अमेरिकाले चिनियाँ निर्यातमा आफ्नो निर्भरता कम गर्ने आशा राखेको छ।

ट्रम्पका डेपुटी चिफ अफ स्टाफ स्टीफन मिलरकी श्रीमती केटी मिलरले शनिबार एक्समा अमेरिकी झण्डाको रंगमा डेनिस स्वायत्त क्षेत्रको विवादास्पद तस्बीर पोस्ट गरेकी थिइन्। उनको पोस्टको माथि एउटा शब्द थियो–चाँडै।

स्टीफन मिलरलाई ट्रम्पका धेरैजसो नीतिहरूको शिल्पकारको रूपमा हेरिन्छ। ​​​​​​​ग्रिनल्यान्डकी प्रधानमन्त्री फ्रेडरिक निल्सनले उक्त स्ट्याटसलाई अपमानजनक भनेकी छन्।​​​​​​​

"राष्ट्र र जनताबीचको सम्बन्ध पारस्परिक सम्मान र अन्तर्राष्ट्रिय कानूनमा निर्मित हुन्छ ( हाम्रो हैसियत र अधिकारलाई बेवास्ता गर्ने प्रतीकात्मक इशाराहरूमा होइन," उनले पनि एक्समै लेखिन्।

साथै उनले भनिन्, "हामीले न त आतंकित हुनु पर्ने, न चिन्ता लिनु पर्ने नै कारण छ। हाम्रो देश बिक्रीको लागि छैन र हाम्रो भविष्य सामाजिक सञ्जालका पोस्टहरूले निर्धारण गर्दैन।"