राहदानी छपाइ र वितरण साबिककै तालिकाअनुसार हुने

काठमाडौँ– राहदानी विभागले राहदानी पुस्तिकाको आपूर्ति र छपाइको काम सहज भएपछि अब वितरण प्रक्रियालाई साबिककै अवस्थामा फर्काएको छ। विभागका अनुसार अब राहदानीको वितरण तालिका जेनजी आन्दोलन अघिको नियमित व्यवस्थाअनुसार नै हुनेछ।

सम्बन्धित जिल्ला/इलाका प्रशासन कार्यालय वा विदेशस्थित नेपाली नियोगबाट राहदानीका लागि आवेदन दिने आवेदकको राहदानी समयमै छपाइ गरी पूर्ववत् रूपमा पठाउने व्यवस्था मिलाइएको विभागका सूचना अधिकारी केशवराज पन्थीले जानकारी दिए। 

तत्काल राहदानी आवश्यक परी विभागमा आवेदन दिन परेमा आवेदकको मागअनुसार पर्याप्त भेट समय खुला गरिएकाले आवेदन दिँदा आफूले रोजेको समयमा विभागमा उपस्थित भई सेवा प्रवाहमा सघाउनका लागि सम्पूर्ण सेवाग्राहीप्रति विभागले अनुरोध गरेको छ।

जिल्ला/इलाका प्रशासन कार्यालयबाट कम्तीमा गत मंसिर १५ गतेसम्म आवेदन दिने आवेदकको राहदानी तयार गरी पठाइ सकिएको र त्यसपछि आवेदन दिने आवेदकको पुस २५ गतेसम्ममा पठाउने व्यवस्था मिलाइएको विभागले जनाएको छ। 

विभागले विदेशस्थित नेपाली नियोगबाट मंसिर मसान्तसम्म आवेदन दिने आवेदकको राहदानी वैयक्तिकरण गरी पठाइ सकिएको र अन्य आवेदकको हकमा नियमित तालिकाअनुसार पठाउने व्यवस्था मिलाउनुका साथै यही महिनाको २५ गतेपश्चात् साबिककै समय तालिकाअनुसार एक/दुई हप्ताको अन्तरमा छपाइ गरी सम्बन्धित कार्यालयमा पठाइने व्यवस्था मिलाइएको छ ।