चिसोले महोत्तरीका विद्यालय बन्द

जलेश्वर– चिसो बढेपछि महोत्तरीका स्थानीय तहले विद्यालयमा बिदा दिएका छन्। 

निरन्तरको चिसो हावा, शीतलहर, बाक्लो कुहिरो र हुस्सुले जनजीवन प्रभावित हुन थालेपछि महोत्तरीका १५ वटै स्थानीय तहले विद्यालय बिदा दिने निर्णय गरेका हुन्। 

स्थानीय तहले बर्खे बिदाबाट कटौती हुनेगरी दुईदेखि तीन दिन बिदाको घोषणा गरेका छन्। विज्ञप्ति जारी गर्दै विद्यालयमा अध्ययनरत बालबालिका अत्यधिक जाडोका कारण प्रभावित हुन थालेको जनाउँदै नगरभित्रका विद्यालयमा पठनपाठन बन्द गराएका छन्।

तराई–मधेशमा विगत केही दिनदेखि शीतलहर र चिसो हावा चल्न थालेको छ। अत्यधिक जाडोका कारण बालबालिका र वृद्धवृद्धा बढी प्रभावित भएका छन्।