नेपालसँग नेदरल्यान्ड्स ५ विकेटले पराजित

काठमाडौँ– आईसीसी विश्वकप लिग२ को खेलमा नेपालले नेदरल्यान्ड्सलाई पराजित गरेको छ।

स्कटल्यान्डको डन्डीमा बुधबार राति सम्पन्न खेलमा नेपाल ५ विकेटले विजयी भएको हो। २२६ रनको विजयी लक्ष्य नेपालले ४७.१ ओभरमा ५ विकेट गुमाउँदै पूरा गर्‍यो। 

नेपालको जितमा आरिफ शेखले सर्वाधिक ७८ रनको योगदान दिए। उनले ९९ बलमा ७ चौका र २ छक्का प्रहार गरेका थिए। उनी खेलको प्लेयर अफ द म्याचसमेत घोषित भए।

दीपेन्द्रसिंह ऐरीले अविजित ३८ रन बनाए। कुशल भुर्तेलले २५, रोहित पौडेलले २३, आसिफ शेखले १९ तथा भीम सार्कीले ११ रन बनाए। 

नेदरल्यान्ड्सका माइकल लेभिटले २ तथा भिभियन किंग्मा र पल भान मेकरेनले समान १–१ विकेट लिए।

त्यसअघि टस जितेर ब्याटिङ रोजेको नेदरल्यान्ड्स ४९.१ ओभरमा २२५ रनमा अलआउट भयो। नेदरल्यान्ड्सका नोहा कोर्सले सर्वाधिक ४८ रन बनाए। 

नेपालका सोमपाल कामीले ३ तथा करण केसी, ललित राजवंशी र सन्दीप लामिछानेले समान २–२ विकेट लिए।

जितसँगै  नेपाल १४ खेलमा १० अंकका साथ लिगको सातौँ स्थानमा छ। पराजित नेदरल्यान्डस २१ खेलमा २६ अंकसहित अंकसहित तालिकाको दोस्रो स्थानमा यथावत् छ।