Monday, June 17, 2024

-->

यारीगाउँको अरनिको प्राविमा २ विद्यार्थी पढाउन ३ शिक्षक

बालविकासको पढाइ सकिएलगत्तै अभिभावकले विद्यार्थीलाई अन्यत्रै पठाउने गरेकाले १ देखि ५ कक्षामा विद्यार्थी भर्ना नभएका प्रधानाध्यापक हरिनारायण चौधरीको भनाइ छ।

यारीगाउँको अरनिको प्राविमा २ विद्यार्थी पढाउन ३ शिक्षक
प्रतीकात्मक तस्वीर

हुम्ला– हुम्लाको उत्तरी भेगको नाम्खा गाउँपालिका–५ यारीगाउँस्थित अरनिको प्राथमिक विद्यालयमा दुई विद्यार्थी र तीन शिक्षक छन्।

विद्यालयका प्रधानाध्यापक हरिनारायण चौधरीले प्राथमिक तहको विद्यालयमा बालविकासमा दुई जना विद्यार्थीले अध्ययन गर्दै आएका बताउँदै आफूसहित तीन जना शिक्षकले पठनपाठन गर्ने गरेको जानकारी दिए। उनका अनुसार तीन जनामध्ये दुई प्रावि तहको दरबन्दीका र एक बालविकासको सहजकर्ता छन्।

कक्षा ५ सम्म पठनपाठन हुने उक्त प्राविमा कक्षा १ देखि ५ मा अध्ययन गर्ने विद्यार्थी अहिलेसम्म भर्ना नभएका प्रधानाध्यापक चौधरीले बताए। बालविकासको पढाइ सकिएलगत्तै अभिभावकले ती विद्यार्थीलाई अन्यत्रै पठाउने गरेकाले अन्य कक्षामा विद्यार्थी भर्ना नभएका उनको भनाइ छ। 

गत वर्षसम्म सात जना विद्यार्थीले विद्यालयमा अध्ययन गरेका भन्दै प्रधानाध्यापक चौधरीले बालविकासमा अध्ययनरत विद्यार्थी पनि नियमित नआउने भएकाले आफूहरू कुरेर विद्यालयमा बस्ने गरेको बताए। विद्यालय खाली हुने गरी विद्यार्थीलाई अन्यत्र नपठाउन अभिभावकसँग पटक–पटक आग्रह गरिरहेको उनको भनाइ छ।

नाम्खा गाउँपालिका शिक्षा शाखाका प्रमुख मनराज बुढाले सानै उमेरमा विद्यालय छाड्ने समस्या पालिकाभरि भएको भन्दै बढी अरनिको प्राविमा देखिएको बताए। उक्त विद्यालयलाई तत्काल समायोजन गर्न सकिने अवस्था नरहेको उनको भनाइ छ।

अभिभावकले विद्यालयमा भन्दा पनि गुम्बामा पढाउन उपयुक्त ठान्ने गरेकाले यस्तो समस्या आएको बुढाले बताए। उनका अनुसार गत वर्ष राष्ट्रपति शैक्षिक सुधार कार्यक्रममार्फत दुई कोठे भवन निर्माण गरिएको थियो । 

यसअघि विद्यालयसँग भएका तीन वटा भवनको अवस्था पनि स्तरोन्नति गरिएको छ। नाम्खा गाउँपालिकामा विद्यार्थी नभएर विद्यालय बन्द गर्नु परिरहेको छ। यसअघि लिमीका दुई विद्यालय बन्द भइसकेका छन्।


सम्बन्धित सामग्री