महेन्द्रनगर– कञ्चनपुरको दोधारा चाँदनी नगरपालिकामा बिहीबार आगलागी हुँदा सात बिघाभन्दा बढी जमिनमा लगाएको गहुँ नष्ट भएको छ।
दोधारा चाँदनी–७ बाबाथानमा रुखको हाँगामा बिजुलीको तार खसेपछि निस्केको आगोको झिल्काले गहुँबालीमा आगलागी भएको दोधारा चाँदनी नगरपालिकाका प्रवक्ता ओम बस्नेतले जानकारी दिए। पुजन बरालसहित १५ स्थानीयको गहुँबालीमा आगलागी भएको छ।
“आगलागीबाट सात बिघा जमिनको गहुँबाली पूर्ण रूपमा क्षति भएको छ,” बस्नेतले भने, “स्थानीय, सुरक्षा निकाय, जनप्रतिनिधि र भीमदत्त र दोधारा चाँदनी नगरपालिकाको दमकलको सहायताले आगो निभाइएको थियो।”
उता, कैलालीको जोशीपुर गाउँपालिका र भजनी नगरपालिकामा पनि आगलागीबाट किसानको घर भित्र्याउने बेलाको गहुँ खेतमै जलेको छ। जोशीपुरमा १३ कट्ठा र भजनीमा आठ कट्ठा जमिनमा लगाएको गहुँ नष्ट भएको हो।
आगलागीबाट जोशीपुर–४ खर्चुवाका किसान परशुराम चौधरीको काटेर थुपारेको र काट्न बाँकी रहेको गहुँ जलेको इलाका प्रहरी कार्यालय जोशीपुरले जानकारी दिएको छ।
यहाँ पनि बिजुलीको तार गहुँखेतमा लत्रिएका कारण आगलागी भएको प्रहरीले जनाएको छ। आगो स्थानीय बासिन्दा, प्रहरी र टीकापुरको दमकलको सहायतामा निभाइएको थियो।
उता, भजनी नगरपालिका– ८ जनकपुरमा नारायणप्रसाद देवकोटाले आठ कट्ठामा लगाएको काट्ने बेला भएको गहुँमा पनि आगो लागेको छ।