बागलुङ– मध्यपहाडी पुष्पलाल लोकमार्गको समस्याग्रस्त खण्डको रूपमा रहेको बागलुङको बिहुँ खण्ड कालोपत्र गर्नका लागि पुनः बोलपत्र आह्वान गरिएको छ। ठेक्का सम्झौता गरेको सात वर्षसम्म कालोपत्र नगर्ने मध्यपहाडी पुष्पलाल लोकमार्गको बागलुङ बिहुँ खण्डको निर्माण व्यवसायीसँग रद्द गरिएको ठेक्का नौ महिनापछि पुनः खुलाइएको छ।
आगामी असारभित्रै निर्माण व्यवसायीलाई काममा ल्याउने गरी ठेक्का खोलिएको मध्यपहाडी पुष्पलाल लोकमार्ग आयोजना कार्यालय पर्वतले जनाएको छ। मध्यपहाडी पुष्पलाल लोकमार्गस्थित अलपत्र बागलुङको बिहुँ खण्डको १२ किमी सडक कालोपत्रका लागि पुनः ठेक्का लगाइएपछि आन्दोलनरत स्थानीय बासिन्दा खुशी छन्।
दुई वर्षमा सक्नुपर्ने काम पाँच पटक म्याद थाप्दासमेत नगर्ने निर्माण व्यवसायीसँगको सम्झौता रद्द गरेर पुनः २४ करोड रुपैयाँको लागतमा ठेक्का लगाउनका लागि निर्माण व्यवसायीसँग आह्वान गरिएको मध्यपहाडी पुष्पलाल लोकमार्ग आयोजना कार्यालय पर्वतका प्रमुख कल्पना अधिकारीले जानकारी दिए।
अधिकारीका अनुसार ७२ प्रतिशत भौतिक प्रगति गरेको निर्माण व्यवसायीसँग ठेक्का रद्द गरी पुनः मूल्यांकनका आधारमा नौ महिनापछि ठेक्कामा गएको हो। हालसम्म सम्पन्न भइसकेको भौतिक पूर्वाधारका आधारमा बाँकी गर्नुपर्ने काम र थप कामसमेत गरी १२ किमी सडकमा २४ करोड रुपैयाँ लाग्ने अनुमान गरिएको सूचना अधिकारी तथा इन्जिनियर पवन सुवेदीले बताए।
बागलुङको बिहुँदेखि घोडाबाँधेसम्मको १२ किमी सडक कालोपत्रका लागि २०७२ साल माघमा दुई वर्षमा कालोपत्र सक्नेगरी सूर्य कन्स्ट्रक्सनसँग ठेक्का सम्झौता गरिएको थियो। “पाँच पटक ठेक्का सम्झौता म्याद थप भए पनि काम नहुँदा गत असार १० गते मध्यपहाडी पुष्पलाल लोकमार्गले ठेक्का रद्द गरेको थियो”, इन्जिनियर सुवेदीले भने, “ठेक्का सम्झौता रद्द गरिएको नौ महिनापछि गत चैत ३० गते ठेक्का आह्वान गरिएको छ, आगामी असारसम्म सडक निर्माणमा खटिने गरी निर्माण व्यवसायी छनोट गरेर पटाउँछौँ।”
दुई दशकअगाडि ट्र्याक खुलेको राष्ट्रिय गौरवको आयोजना मध्यपहाडी लोकमार्गअन्तर्गत बागलुङको बिहुँ–घोडाबाँधे खण्ड अहिलेसम्म कालोपत्र हुन नसक्दा नागरिकले सास्ती खेप्नु परेको भन्दै स्थानीयले संघर्ष समिति निर्माण गरेरै चरणबद्ध आन्दोलन गर्दै आएका छन्। स्थानीयको मागअनुसार नै ठेक्का सम्झौता रद्द गरी पुनः ठेक्का लगाइएको आयोजनाले जनाएको छ।
पुनः ठेक्का लगाइएको सडकमा दुई वर्षभित्रै कालोपत्र सक्ने योजना मध्यपहाडी लोकमार्गको छ। विसं २०५४ मै बाटो आउँदा हर्षित बनेका बागलुङको बिहुँका स्थानीय सडक कालोपत्र नहुँदा हिउँदमा धुलो र बर्खामा धुलोले आजित बनेका छन्।
सडक कालोपत्रमा चरम लापरबाही भएको भन्दै पटक–पटक सडक अवरुद्ध गर्दै आएको र अहिले पुनः ठेक्कामा जाँदा केही आशावादी रहेको स्थानीय डिलप्रसाद कँडेलले बताए।