काठमाडौँ– प्रधानमन्त्री पुष्पकमल दाहाल ‘प्रचण्ड’ले भ्रष्टाचारविरुद्धको लडाइँ नरोकिने बताएका छन्।
नक्कली भुटानी शरणार्थी प्रकरण, ललिता निवास प्रकरण र मिटरब्याजी प्रकरणमा सरकारले एकपछि अर्को सफलता हात पारिरहेको प्रधानमन्त्री दाहालको दाबी छ।
बुधबार प्रतिनिधिसभा बैठकमा प्रधानमन्त्री कार्यालय, उपराष्ट्रपति कार्यालय र राष्ट्रिय योजना आयोग सचिवालयको बजेटमाथि सांसदले उठाएका प्रश्नको जवाफ दिने क्रममा उनले वर्षौँदेखि डुंगुरका रूपमा रहेको भ्रष्टाचारविरुद्धको लडाइँ नरोकिने बताएका हुन्।
“नक्कली भुटानी शरणार्थी प्रकरणमा सफलता हातपारेसँगै उच्चपदस्थ र देशका एउटा वर्ग कानूनभन्दा माथि छ भन्ने निराशावादी मान्यता गलत प्रमाणित हुँदै गएको छ,” प्रधानमन्त्री दाहालले भने, “संसद् र जनसमुदायलाई म यही रोष्टमबाट विश्वास दिलाउन चाहन्छु– यो शुद्धीकरण यतिमा रोकिने छैन।”
प्रधानमन्त्री दाहालले मुलुकमा सुशासनका लागि अभियान नै शुरू गरेको उल्लेख गर्दै त्यसमा सदन र जनताले सरकारलाई साथ दिनुपर्ने आवश्यकता पनि औँल्याए।