इरानद्वारा अमेरिकी सैन्य आक्रमणको कडा निन्दा

इरानी विदेश मन्त्रालयले बुधबार इरानविरुद्धको अमेरिकी सैन्य आक्रमणको कडा निन्दा गरेको छ।

स्ट्रेट अफ होर्मुजमा सोमबार राति अमेरिकी सैन्य हेलिकप्टर दुर्घटना भएपछि, संयुक्त राज्य अमेरिकाले बुधबार इरानको दक्षिणी क्षेत्रमा ‘क्रूर’ आक्रमण गरेको मन्त्रालयले विज्ञप्तिमार्फत जनाएको छ।

इरानको राष्ट्रिय सार्वभौमिकता र क्षेत्रीय अखण्डताको खुल्लमखुल्ला उल्लंघन भएको भन्दै प्रतिक्रियामा, इरानी सशस्त्र बलले आत्मरक्षाका क्रममा मध्यपूर्वमा रहेका अमेरिकी आधार र सम्पत्तिमा प्रहार गरेको विज्ञप्तिमा उल्लेख छ।

इरानले क्षेत्रीय देशहरूलाई इरानविरुद्ध ‘आक्रमणकारी कार्यहरू’ गर्न, संगठित अपराध गर्न र समर्थन गर्न आफ्नो क्षेत्र तथा सुविधाहरूको प्रयोग रोक्न आग्रह गर्दै जवाबी कारबाहीको चेतावनी दिएको छ।

आक्रमणपछि इरानी विदेशमन्त्री सैयद अब्बास अराघचीले आफ्ना टर्की र साउदी समकक्षी हाकान फिदान र फैसल बिन फरहान अल सौदसँग पछिल्लो क्षेत्रीय घटनाक्रमबारे छुट्टाछुट्टै फोनवार्ता गरेका छन्।

इरानको इस्लामिक रिभोलुसनरी गार्ड कर्प्सले बुधबार बहराइन, कुवेत र जोर्डनमा रहेका अमेरिकी अड्डाहरूमा मिसाइल र ड्रोन आक्रमण गरेको पुष्टि गरेको छ।

यसैबीच, अमेरिकी सेन्ट्रल कमान्डले बुधबार सामाजिक सञ्जाल मार्फत अमेरिकी सेनाको अपाचे हेलिकप्टर खसालिएको प्रतिक्रियामा इरानी लक्ष्यहरू विरुद्ध “आत्मरक्षा“ मा आक्रमणहरू गरिएको जनाएको छ।