सुन तस्करीदेखि शरणार्थी प्रकरणसम्मको अनुसन्धान गर्ने १० प्रहरीको विशेष बढुवा

काठमाडौँ– नेपाल प्रहरीले १० प्रहरी कर्मचारीलाई ‘विशेष बढुवा’ गर्ने निर्णय गरेको छ।

प्रहरी महानिरीक्षक बसन्तबहादुर कुँवरले आर्थिक वर्षभरि विशेष तथा उत्कृष्ट काम गर्ने प्रहरीलाई विशेष बढुवा गरेको प्रहरी प्रवक्ता कुवेर कडायतले जानकारी दिए। उनका अनुसार सुन तस्करी, भारतीय नोट तस्करी, विप्लव समूहदेखि शरणार्थी प्रकरणमा अनुसन्धान गर्ने प्रहरीलाई बढुवा गरिएको हो। 

 प्रहरी नियमावली, २०७१ मा उत्कृष्ट कार्य गर्ने प्रहरी कर्मचारीलाई नीति निर्माण समितिको सिफारिसमा श्रेणीविहीनबाहेक राजपत्र अंकित पदसम्म एक तहमाथिको रिक्त पदमा बढुवा गर्नसक्ने उल्लेख छ। 

विशेष बढुवामा परेकामा राष्ट्रिय प्रहरी प्रशिक्षण प्रतिष्ठानमा कार्यरत प्रहरी नायब निरीक्षक तिलराम बोहरा सार्की वरिष्ठ नायब निरीक्षक भएका छन्। त्रिभुवन अन्तर्राष्ट्रिय विमानस्थल सुरक्षा कार्यालय दरबन्दी भएका प्रहरी सहायक निरीक्षक अर्जुन सेठ्ठी र अख्तियार दुरुपयोग अनुसन्धान आयोग बुटवलका वामदेव घिमिरेलाई प्रहरी नायब निरीक्षकमा बढुवा गरिएको छ।

यसैगरी प्रहरी सहायक हवलदारबाट हवलदार पदमा बढुवा हुनेमा जिल्ला प्रहरी कार्यालय सोलुखुम्बु दरबन्दी भएका सुवास नेपाली, केन्द्रीय अनुसन्धान ब्युरोका लक्ष्मण सापकोटा, लागुऔषध नियन्त्रण ब्युरोका भुदरमणि जोशी, वडा प्रहरी कार्यालय बिर्ता पर्साका गनकुमार खण्डमुल, प्रहरी प्रधान कार्यालय सुरक्षा सेवा व्यवस्थापन महाशाखा अंगरक्षक गणका उपेन्द्र चौधरी रहेका छन्।

त्यस्तै विशेष ब्युरोमा कार्यरत प्रहरी हवलदार सविर अलि अन्सारी वरिष्ठ प्रहरी हवलदारमा र प्रहरी प्रधान कार्यालय कार्य विभाग मर्यादा पालक एकाइका प्रहरी जवान लोचन अधिकारी प्रहरी सहायक हवलदारमा बढुवा भएका छन्।