नक्कली मदिरा बनाइ बिक्री गरेको आरोपमा दुई जना पक्राउ

रुपन्देही- नक्कली स्टिकर तथा नक्कली मदिरा बनाएर बिक्रीवितरण गरी राजस्व छली गरेको आरोपमा रुपन्देही प्रहरीले भैरहवाबाट दुई जनालाई पक्राउ गरेको छ।

रुपन्देहीको सिद्धार्थनगर नगरपालिका–९ बस्ने २८ वर्षीय नवीन पन्थी र सोही ठाउँका ३१ वर्षीय मुक्तार पठानलाई नियन्त्रणमा लिई अनुसन्धान गर्ने क्रममा नक्कली स्टिकर तथा नक्कली रक्सी बनाई बिक्री गर्ने गरेको पाइएको जिल्ला प्रहरी कार्यालय रुपन्देहीका प्रवक्ता प्रहरी नायब उपरीक्षक श्यामु अर्यालले जानकारी दिए। अम्बिका ट्रेडर्स सञ्चालक पन्थी र पठानलाई राजस्व छली नक्कली स्टिकर तथा नक्कली मदिरा बनाएर बिक्री वितरण गरेको भन्ने गोप्य सूचना आधारमा पक्राउ गरिएको हो।

प्रवक्ता अर्यालका अनुसार उनीहरूले स्थानीय फिरोज खानको घरमा कोठा भाडामा लिइराखेको अवस्थामा आन्तरिक राजस्व विभाग लेखेको स्टिकर ५९३ वटा, सिग्नेचरको खाली बोतल ४८ वटा, ओल्ड दरबार लेखेको खाली बोतल १६ वटा, गोल्डेन ओक लेखेको खाली बोतल नौ वटा, सिग्नेचर १८० एमएलको १२ बोतल बरामद गरिएको छ।

यस्तै सिग्नेचर ३७५ एमएलको दुई बोतल, गोल्डेन ओक १८० एमएलको चार बोतल, ओल्ड दरबार रेगुलर १८० एमएलको तीन बोतल, ओल्ड दरबार रेगुलर ३७५ एमएलको एक बोतल, १८० एमएलको एटएटफोरएट ४१ बोतल, जारको भाँडामा रहेको रक्सी जस्तो तरल पदार्थ एक लिटर बरामद गरिएको छ। बरामद गरिएको सामान तथा व्यक्तिहरूलाई आवश्यक कारबाहीका लागी आन्तरिक राजस्व कार्यालय भैरहवा पठाइएको प्रहरीले जनाएको छ।