आईसीसी क्रिकेट विश्वकप लिग–२ मा नेपालले आज अमेरिकासँग खेल्दै

काठमाडौँ– नेपालले आईसीसी क्रिकेट विश्वकप लिग–२ अन्तर्गत आज अमेरिकासँग खेल्दैछ। खेल त्रिवि क्रिकेट रंगशालामा बिहान ९:३० बजे शुरू हुनेछ। तर काठमाडौँमा वर्षा भइरहेका कारणले खेल प्रभावित हुनसक्ने सम्भावना पनि रहेको छ।

यो जारी त्रिकोणात्मक शृंखलाको अन्तिम खेल हो। शृंखलामा नेपाल, स्कटल्यान्ड र अमेरिका सहभागी छन्। नेपालले यसअघि अमेरिकालाई ९ विकेटले पराजित गरेको थियो भने स्कटल्यान्डविरुद्ध एक खेलमा २ रनको हार र अर्को खेलमा जित निकालेको थियो।

विश्वकप लिग–२ को अंक तालिकामा अमेरिका शीर्षस्थानमा छ। अमेरिकाले २७ खेलमा १९ जित र ८ हारसहित ३८ अंक बनाएको छ। नेपाल २७ खेलमा १० जित, १५ हार र २ खेलमा नतिजाविहीन हुँदै २२ अंकसहित पाँचौँ स्थानमा छ।

नेपाल पछिल्ला पाँच खेलमध्ये चार खेलमा विजयी भएको छ। घरेलु मैदानमा भइरहेको शृंखलामा नेपाल अमेरिकाविरुद्ध लगातार दोस्रो जित निकाल्ने लक्ष्यमा हुनेछ।