वर्षाले प्रभावित गरेको खेलमा ओमानसँग नेपाल पराजित

काठमाण्डाैँ– आईसीसी विश्वकप लिग–२ अन्तर्गत त्रिदेशीय एकदिविसीय शृङ्खलामा नेपाल ओमानसँग पराजित भएको छ। वर्षाका कारण खेल रोकिएपछि डकवर्थ-लेविस-स्टर्न (डीएलएस) नियमका आधारमा नेपाल १०२ रनले पराजित भएको हो।

कीर्तिपुरस्थित त्रिवि अन्तर्राष्ट्रिय क्रिकेट मैदानमा ओमानले दिएको ३०६ रनको लक्ष्य पछ्याएको नेपालले ३६ ओभर ५ बलमा ७ विकेट गुमाएर १५५ रन बनाउँदा वर्षाका कारण खेल रोकिएको थियो।

नेपालका लागि दीपेन्द्रसिंह ऐरीले ६० रन बनाए भने ओमानका नदीम खानले ३ विकेट लिए।

यसअघि टस जितेर ब्याटिङ गरेको ओमानले ५० ओभरमा ८ विकेट गुमाएर ३०५ रन बनाएयो। ओमानका कप्तान जतिन्दर सिंहले शतक जोडे। नेपालका सोमपाल कामीले ४ विकेट लिए।